Stanislav Çerçesov artıq Qazaxıstan yığmasını çalışdırmır. Yerli futbol qurumu onunla müqaviləni qüvvədən salmaq qərarına gəlib.

Rusiyalı mütəxəssisin köməkçiləri də işdən azad olunub. Çerçesov milli komandaya 2024-cü ilin yayında təyinat almışdı. Qazaxıstan yığması onun rəhbərliyi altında Millətlər Liqasının 2024/25 mövsümündə keçirdiyi 6 matçda 5 dəfə uduzmuş, 1 oyunu isə heç-heçə başa vurmuşdu. Maraq üçün komandanın bu oyunlarda qol vura bilmədiyini və qapısından 15 top buraxdığını da xatırladaq.

Qazaxıstan Futbol Federasiyasının məlumatında Çerçesovla müqavilənin qarşılıqlı razılıq əsasında pozulduğu bildirilib.

Maraqlıdı ki, rusiyalı məşqçi bunun doğru informasiya olmadığını, əməkdaşlığın məhz qarşı tərəfin qərarı ilə dayandırıldığını deyib.