Yüksək məhsuldarlıq, qeyri-adi süjetlər, gözlənilməz nəticələr – premyer-liqaya xas bu özəlliklər hesabat turu üçün də keçərli oldu. “Liverpul” “Arsenal”la xal fərqini artırdı, “Nottingem Forest” də yüksək yerlər uğrunda mübarizədən çəkilmək fikrində deyil, “Mançester Siti” tədricən özünə gəlir. Mançesterin digər təmsilçisinin isə belə nəticələr fonunda avrokuboklardan kənarda qalması tam realdı. Elə son 6 çempionat oyununda qələbəyə həsrət qalan “Tottenhem” də onun kimi.

“Liverpul” azarkeşlərini, nəhayət, 2025-də çempionatdakı ilk qələbəsi ilə sevindirdi. Mersisaydlılar səfərdə “Brentford”a qalib gəldi. Londondakı qarşılaşma Slotun komandası üçün çətin keçdi. “Brentford” cari mövsümdə “doğma divarlar” arasında ən yaxşı oynayan komandalardandı. Odu ki, “Liverpul”un çətinliklə üzləşməsi təəccüb doğurmadı. Digər tərəfdən, lider oyunun əksər bölümündə önəmli üstünlüyə malik oldu. Qonaqlar qapıya 37 zərbə vurdu, 15 künc zərbəsi yerinə yetirdi. Sadəcə, çoxsaylı hücumların son mərhələsində dəqiq qərarlar çatışmırdı. Məsələn, Soboslai ilk yarıda topu tirə vurdu, ardından Qakpo təkbətəkdən yararlanmadı. 2-ci hissədə isə elə həmin Qakpo, həmçinin Dias, Salah və başqa oyunçular yaxşı imkanları qaçırdılar. Meydan sahibləri real təhlükə yaratmasalar da, Alisson bir neçə dəfə oyuna qoşulmalı oldu. Nəhayət, uzatma dəqiqələrində “Liverpul” rəqibin müqavimətini qırdı. Daha doğrusu, Slotun əvəzetməsi işə yaradı. 65-ci dəqiqədə meydana çıxan Nunyes dubl etməklə oyunun qəhrəmanına çevrildi. Lider böyük çətinliklə, ancaq haqq etdiyi qələbəni qazandı. “Liverpul” ən yaxın izləyicisini 6 xal qabaqlayır. Hələ ehtiyatda bir oyunu da var.

Təbii ki, xal fərqinin belə olmasında “Arsenal”ın qeyri-sabit oyununun rolu böyükdü. “Topçular” evdə “Aston Villa”nı məğlub edə bilmədi. Baxmayaraq ki, oyun əsasın Artetanın komandasının ssenarisi əsasında davam etdi. Meydan sahibləri ilk dəqiqələrdən böyük oyun və ərazi üstünlüyünə yiyələndi. Birmingemilər isə əsasən əks-hücumlarla kifayətlənirdilər. “Arsenal” ilk yarının ortalarında oyunu axarına uyğun olan qolu vurdu. 2-ci hissənin əvvəlində isə Haverts fərqi artırdı. Ancaq Artetanın komandası bundan sonra gözlənilmədən konsentrasiyanı itirdi. Rəqib isə bundan ustalıqla yararlandı. Saatın tamamında Tilemans fərqi minimuma endirdi. Ardından belçikalı topu dirəyə vurdu. Əvəzində Uotkins 68-ci dəqiqədə hesabı bərabərləşdirdi. Belədə “Arsenal” hər şeyə yenidən başlamalı oldu. Gözlənildiyi kimi, sonluq meydan sahiblərinin üstünlüyü şəraitində keçdi. Hətta final fiti ərəfəsində Haverts növbəti dəfə rəqib qapısına yol tapdı, ancaq əllə oyuna görə qol sayılmadı. Təbii ki, Arteta və oyunçuları bəxtsizlikdən şikayətlənə bilər. Ancaq çempionluq uğrunda mübarizə aparan komanda rəqibə hesabı belə asanlıqla bərabərləşdirmək imkanı yaratmamalıdı.

“İpsviç” – “Mançester Siti” oyununda ciddi mübarizə yaşanmadı. “Şəhərlilər” heç bir əziyyət çəkmədən böyükhesablı qələbə qazandı. Darmadağının əsası ilk yarım saatın sonunda – Fodenlə Kovaçiç 3 dəqiqə intervalla iki qol vuranda qoyuldu. Foden fasilə ərəfəsində 3-cü topu rəqib qapısından keçirəndə artıq oyunun taleyi bəlli oldu. 2-ci hissə də MS-nin aşkar üstünlüyü şəraitində keçdi. Hissənin əvvəlində Dokyu fərqi artırdı, saatın tamamında isə Holann da səhnəyə çıxdı. Bundan sonra Qvardiola gənclərə özünü göstərmək imkanı yaratdı. Və Makeyti bu imkandan necə lazımdı yararlandı. “Siti” yavaş-yavaş ənənəvi oyununu və nəticələri göstərməyə başlayır. Ancaq Qvardiolanın komandasını irəlidə daha ciddi sınaqlar gözləyir.

“Mançester Yunayted”in “həyana dönməsi” ilə bağlı heç bir əlamət yoxdu. Amorimin komandası hesabat turunda növbəti məğlubiyyətlə barışdı. “Brayton” daha mütəşəkkil oyun göstərdi və qol vəziyyətlərinə həssas yanaşdı. Uzun müddət meydanda bərabər mübarizə getdi. Hərçənd “Brayton” artıq 5-ci dəqiqədə irəli çıxdı. MY hissənin ortalarında bərabərliyi təmin etdi. Ancaq favorit qol vəziyyətləri yaratmaqda çətinlik çəkirdi. 2-ci hissədə də belə vəziyyətlərin sayı çox olmadı. Belədə imkanlardan yararlanmaq bacarığı və fərdi səhvlər ön plana çıxdı. Mankunianlar daha çox səhvə yol verdi, bu üzdən “qağayılar”ın saatın tamamında hesabda irəli çıxması təəccüb doğurmadı. 76-cı dəqiqədə isə Onananın kobud səhvindən sonra daha bir qol vuruldu. “Brayton” asanlıqla oyunu qələbəyə daşıdı, MY növbəti dəfə azarkeşlərini məyus etdi.

“Tottenhem”in dərdinə çarə tapılmır. “Everton” Devid Moyesin dönüşündən sonra ilk qələbəsini məhz “mahmızlar” üzərində qazandı. Liverpul klubu ilk yarıda üç qol vurdu. 2-ci hissədə ayılan “Tottenhem”in gücü yalnız fərqi minimuma endirməyə çatdı. Maraqlıdı ki, “Nottingem Forest” – “Sauthempton” oyununda da eyni ssenari təkrarlandı. Burda da meydan sahibləri ilk yarıda 3 qol vurdu, qonaqlar fasilədən sonra qollardan ikisinin əvəzini çıxdı. Yeri gəlmişkən, “meşəçilər” premyer-liqadakı məğlubiyyətsiz oyunlar seriyasını 8-ə çatdırdı.

Turun qalan oyunlarına gəlincə, “Bornmut” “Nyukasl”ın bütün turnirləri əhatə edən 9 oyunluq qələbə seriyasına son qoydu. Bu oyunun qəhrəmanı Klyuvert “Bornmut”un tarixinə bir mövsümdə iki dəfə het-trik edən ilk futbolçu kimi düşdü. Xatırladaq ki, niderlandlı hücumçu
13-cü turun “Vulverhempton”la səfər oyununda (4:2) da 3 qol vurmuşdu. Özü də hamısını penaltidən!

“Lester” – “Fulhem”, “Vest Hem” – “Kristal Pelas” oyunlarında eyni hesab qeydə alındı. Hər iki oyunda qonaqlar iki cavabsız qolla qalib gəldi. Turun son oyununda isə “Çelsi” “Vulverhempton” üzərində inamlı qələbə qazandı.

22-ci tur
Brentford – Liverpul 0:2
Nunyes, 90+1; 90+3. (17215)
Liverpul: Alisson, Aleksander-Arnold, Konate, Van Diyk, Simikas (Robertson, 65), Qravenberx, Makallister (Cons, 80), Salah, Soboslai (Elliott, 80), Qakpo (Kyeza, 87), Dias (Nunyes, 65).
Arsenal – Aston Villa 2:2
Martinelli, 35. Haverts, 55 – Tilemans, 60. Uotkins, 68. (60067)
Arsenal: Rayya, Parti, Timber, Qabriel, Lüis-Skelli, Edeqor, Rays, Merino, Martinelli (Sterlinq, 82), Haverts, Trossar.
İpsviç – Mançester Siti 0:6
Foden, 27; 42. Kovaçiç, 30. Dokyu, 49. Holann, 57. Makeyti, 69. (29841)
MS: Ederson, Akanci (O”Rayli, 72), Diaş, Qvardiol, Kovaçiç (Lüis, 72), Gündoğan, Foden (Qriliş, 63), De Bruyne (Makeyti, 63), Nunyeş, Dokyu, Holann (Mubama, 63).
Mançester Yunayted – Brayton 1:3
Fernandeş, 23-p. – Mintex, 5. Mitoma, 60. Rütter, 76. (73758)
MY: Onana, Yoro, Maquayr, De Liqt, Mazraui (Antoni, 84), Uqarte (Kollyer, 64), Maynu (Qarnaço, 64), Dalot, Dyallo, Fernandeş, Zirkzee (Heylunn, 84).
Everton – Tottenhem 3:2
Kalvert-Lüin, 13. Ndiay, 30. Qrey, 45+7-öz qapısına – Kulusevski, 77. Rişarlison, 90+2. (39326)
Tottenhem: Kinski, Qrey, Drequşin (Rişarlison, 46), Devis, Porro, Berqvall, Sarr (Mur, 73), Spens, Kulusevski, Son Hın Min, Meddison.
Nottingem Forest – Sauthempton 3:2
Anderson, 11. Hadson-Odoi, 28. Vud, 41 – Bednarek, 60. Onuaçu, 90+2. (30180)
Nyukasl – Bornmut 1:4
Gimaraynş, 25 – Klyuvert, 6; 44; 90+2. Kerkez, 90+6. (52227)
Lester – Fulhem 0:2
Smit-Rou, 48. Traore, 68. (31500)
Vest Hem – Kristal Pelas 0:2
Mateta, 48; 89-p. (62325)
Çelsi – Vulverhempton 3:1
Adarabioyo, 24. Kukurelya, 60. Madueke, 66 – Doherti, 45+5.

1. Liverpul 21 15 5 1 50-20 50
2. Arsenal 22 12 8 2 43-21 44
3. Nottingem F. 22 13 5 4 33-22 44
4. Çelsi 22 11 7 4 44-27 40
5. Mançester S. 22 11 5 6 44-29 38
6. Nyukasl 22 11 5 6 38-26 38
7. Bornmut 22 10 7 5 36-26 37
8. Aston Villa 22 10 6 6 33-34 36
9. Brayton 22 8 10 4 35-30 34
10. Fulhem 22 8 9 5 34-30 33
11. Brentford 22 8 4 10 40-39 28
12. Kristal Pelas 22 6 9 7 25-28 27
13. Mançester Y. 22 7 5 10 27-32 26
14. Vest Hem 22 7 5 10 27-43 26
15. Tottenhem 22 7 3 12 45-35 24
16. Everton 21 4 8 9 18-28 20
17. Vulverhempton 22 4 4 14 32-51 16
18. İpsviç 22 3 7 12 20-43 16
19. Lester 22 3 5 14 23-48 14
20. Sauthempton 22 1 3 18 15-50 6

Bombardirlər: Salah (Liverpul) - 18, Holann (MS) – 17, İsak (Nyukasl) - 15, Palmer (Çelsi), Vud (Nottingem Forest) – 14.
Növbəti turun oyunları yanvarın 25-26-da keçiriləcək: Bornmut – Nottingem Forest, Brayton – Everton, Liverpul – İpsviç, Sauthempton – Nyukasl, Vulverhempton – Arsenal, Mançester Siti – Çelsi, Kristal Pelas – Brentford, Tottenhem – Lester, Aston Villa – Vest Hem, Fulhem – Mançester Yunayted.

Turun rəqəmi
37 – “Liverpul” “Brentford”un qapısına bu qədər zərbə vurmaqla öz rekordunu yenilədi. “Opta”nın müvafiq statistikanı apardığı 2003/04 mövsümündən bəri “qırmızılar” heç bir oyunda bu qədər çox zərbə vurmamışdı. Maraqlıdı ki, 37 zərbədən yalnız son ikisi qolla nəticələndi.

Turun ulduzu
Castin Klyuvert (Bornmut) – cari mövsümdəki ilk het-trikində bütün qolları penaltidən vurmuşdusa, bu dəfə ancaq oyun vəziyyətindən fərqləndi. “Ayaks”da nail olduğu məhsuldarlıq rekordunu təkrarlayan gənc hücumçu komandasının uğurlarının əsas səbəbkarıdı. “Bornmut” bu mövsümün sonunda avrokuboklara vəsiqə qazanarsa, ona minnətdar olmalıdı.

Turun sitatı
Ruben Amorim, MY-nin baş məşqçisi:

Oyundan sonra
Mikel Arteta, “Arsenal”ın baş məşqçisi:

Xosep Qvardiola, MS-nin baş məşqçisi:

Faktlar
* MS “İpsviç”i darmadağın etdi. Beləcə komanda Qvardiola dönəmində 13-cü dəfə çempionat oyununda 6 və daha artıq qol vurdu. İspaniyalı mütəxəssis bu göstəricidə “Arsenal”ın sabiq baş məşqçisi Arsen Vengerə çatdı. Yalnız MY ilə 14 belə qələbə qazanan ser Aleks Ferqyuson onlardan öndədi.
* “Brayton” premyer-liqa çərçivəsində son 8 oyunun 6-da MY-yə qalib gəlib. “Qırmızı şeytanlar” yalnız 2022 və 2024-də qələbəyə sevinib.