"Qarabağ"ın müqaviləsinin şok gizlinləri: Juninyo 5 milyon avrodan baha satılıb!
Azərbaycan futbolunda yanvarın adamı Juninyo oldu. Amma ətrafında çoxlu söz-söhbət dolaşan transferə yekun vuruldu.
"Qarabağ"ın heyətində parlayan braziliyalı artıq “Flamenqo”nun uğurları üçün çalışacaq. 28 yaşlı yeni klubunda 23 nömrəli formanı geyəcək. Tərəflər sövdələşmənin maliyyə yönü ilə bağlı detallı bilgi verməsə də, Braziliya mətbuatı Ağdam klubuna 5 milyon avro təzminat ödəniləcəyini yazıb. Bəs “Qarabağ”ın bu transferdən daha çox pul qazanmasına nə mane oldu - futbolçunun yaşı, yoxsa Azərbaycan çempionatının imici? Azərbaycanda çıxış edən futbolçunu bu qiymətdən baha satmaq mümkün deyilmi: Kadi Borgesin də 2023-ün yanvarında təxminən eyni qiymətə satıldığını nəzərə alsaq, belə çıxır ki, ölkəmizdə oynayan futbolçuların maksimum qiyməti 5 milyon avrodu? Bütün bu sualları Juninyonun transferində iştirak etmiş menecer Tural Əsgərova ünvanladıq:
“Əslində Juninyo 5 milyona satılmayıb. 5 milyondan əlavə növbəti satışdan 20 faizlik pay da var. Bundan başqa, ciddi bonus ödənişləri ola bilər. “Flamenqo”nun hər uğuru “Qarabağ”a pul qazandıracaq. Sonda ola bilər ki, bu transfer bonuslarla birgə 7-8 milyona başa gəlsin. Sabah Juninyo başqa bir kluba satılsa, “Qarabağ”ın ordan da gəliri olacaq. 5 milyona oyunçu satmaq çətindi. Amma bəlkə də bir gün Azərbaycanda daha bahalı futbolçu satılacaq. Burda yaşı da nəzərə almaq lazımdı. Juninyonun 28 yaşı var. İstənilən halda Azərbaycanda oynayıb. Bir çox klubların düşüncəsinə Azərbaycanda oynamaq mənfi təsir göstərir. Avrokuboklardakı çıxış olmasa, nəinki 5 milyona, yarı qiymətə belə satmaq olmaz”.
ƏSƏD SEYİDOV
Digər xəbərlər
