“Şamaxı” fransalı futbolçusu Brahim Konatenin “Futbol+”ə müsahibəsi...

- İkinci yoxlama görüşünüzdə “Sabah”a məğlub olduz. Halbuki fasilədən öncə eyni rəqibi 3:1 hesabıyla məğlub etmişdiz. Yoxlama oyunu olduğundan, yoxsa 120 dəqiqəlik oyunun ağırlığını qaldıra bilmədiyinizdən nəticə belə alındı?
- Niyəsini bilmirəm. Qış fasiləsindən qayıdırıq. Hər cür nəticə normaldı. Çünki yoxlama oyunudu. Mühitlər fərqlidi. Düşərgəyə yeni qoşulanlar var. Rəqiblərimiz də bizim kimi güclənir, yaxşı hazırlıq keçir. Bizə lazım olan iki yoxlama oyununu keçirmək idi ki, bunu da etdik. Əsas odu ki, komandanın yoxlanılması üçün faydalı idi. Bundan sonra bizi ağır oyunlar gözləyir.  

- Təlim-məşq toplanışını necə dəyərləndirsən?
- Yaxşı keçdi. İndi çox çalışırıq ki, mövsümün sonrakı hissəsini uğurla başa vuraq.

- Fiziki durumundan və performansından razısanmı?
- Düşünürəm ki, premyer-liqanın ilk hissəsini çox yaxşı başa çatdırmışam. Bir qədər də inkişaf etməli, artırmalıyam. Komandamın premyer-liqadakı hədəfini tamamlamağa maksimum şəkildə kömək etməliyəm.

- Düşərgədə qarışıq durumlar və xeyli dəyişikliklər oldu. Tam uyğunlaşmısanmı?
- Bəli, yeni oyunçularımız var. Vacib idi ki, bəzi futbolçularımız komandanı tərk elədi. Düşünürəm ki, yeni gələnlər də komandaya xeyir verəcək və güclü şəkildə qoşulacaqlar.

- Komandadan ayrılanlar çox oldu. Sənə də təkliflər varmı, gələcək planların necədi?
- “Şamaxı” mənə etibar etdi və Azərbaycanda oynamaq şansı verdi. Mən də mövsümün sonuna qədər qalıb komandama kömək edəcəm. Rəsmi təkliflərim var. Amma hələ ki “Şamaxı”dayam. Gələcəkdə isə nəyin necə olacağını deyə bilmərəm. Futbol həyatı dəyişikliklərdən qurulub. Mövsümün sonunda hər şey ola bilər.

- Hədəflərin nədi?
- Hər oyun meydana çıxmaq. Qol vurmaq, ötürmə verərək məhsuldar olmaq. Təkcə öz haqqımda düşünməyi sevmirəm. Komandamız haqda düşünürük. Premyer-liqada qalmağı hədəfləyirik. Bu, mənim ən böyük hədəfimdi.

RÖYANƏ OĞUZ