Tezliklə “Flamenqo”nun şərəfini qorumağa başlayacaq Juninyonun yeni müqaviləsinin bəzi detallarına aydınlıq gəlib.

“Football-plus.az” xəbər verir ki, bu haqda “Globo” məlumat yayıb.

Braziliyanın tanınmış nəşri klubun “Qarabağ”ın hücumçusuyla 2028-ci ilin sonuna qədər olan müddəti əhatə edəcək müqavilə bağlayacağını yazıb. Bildirilib ki, futbolçu bu gün tibbi müayinədən keçəcək və hansısa problem ortaya çıxmasa, sənədə qol çəkiləcək. Oyunçunun münasibətlərin rəsmiləşməsindən sonra Uruba şəhərinə yollanacağı və məşqlərə qoşulacağı qeyd olunub.

Juninyo üçün təqdimat mərasimi də nəzərdə tutulub. Lakin bu, tezliklə baş tutmayacaq. Ona görə ki, “Flamenqo”nun idman direktoru Joze Botu ABŞ-də səfərdədi. Mərasim yalnız onun Braziliyaya qayıtmasından sonra baş tutacaq.

Klub Juninyo üçün “Qarabağ”a 5 milyon avro ödəyəcək. Vəsait hissə-hissə ağdamlıların hesabına köçürüləcək. Bəs “köhlən atlar” futbolçunun növbəti satışından pay ala biləcəkmi? Hələ ki bu məqama aydınlıq gəlməyib...

KƏNAN BAHADIR