Lamin Yamal zədələnib və bir neçə həftə meydana çıxa bilməyəcək. Bu haqda xəbəri “Barselona” yayıb.

Kataloniyalıların 17 yaşlı hücumçusu “Leqanes”lə oyunda zədələrək 75-ci dəqiqədə yerini oyundaşına verib. Bazar ertəsi onu müayinədən keçirən klub zədənin ağırlıq dərəcəsini müəyyənləşdirib.

“Barsa”nın saytı bəd xəbər yayıb – Yamal ən azı yanvarın əvvəlinə qədər meydanda görünməyəcək:

Kataloniyalıların göstərilən zaman kəsiyində o qədər çox oyunu olmasa da, hər halda, var. Və sanki azarkeşlərin acığına hər biri vacibdi. Hans-Diter Flikin komandası dekabrın 21-də “Atletiko”nu qəbul edəcək, yanvarın 8-də İspaniya Superkubokunun yarımfinalında “Atletik”lə qarşılacaq. Yanvarın 21-də Çempionlar Liqası çərçivəsində “Benfika” ilə keçiriləcək oyuna qədər isə Lamin artıq bərpa olunmalıdı.
Lamin hələ çox gəncdi (cəmi 17 yaşı var), bu üzdən onun orqanizminin nə dərəcədə möhkəm və yüklənmələrə hazır olub-olmadığı bəlli deyil. Ancaq indiyəqədərki dinamika xoş deyil. Lamin o qədər də uzun sürməyən karyerası boyunca 4 dəfə zədələnib və ümumilikdə 6 ay yaşıl meydandan kənarda qalıb.

Yamal ötən mövsüm iki dəfə - oktyabrda və martda zədələnib, nəticədə üç oyuna çıxmayıb. Cari mövsümdə isə vəziyyət daha pisdi. Noyabrın əvvəlində topuğundan zədələnən hücumçu üç həftəliyə sıradan çıxıb. Ardından 5 oyunda meydana çıxıb və yenidən lazaretə yollanıb.

İnternetdə dərhal “Barselona”nın vaxtilə böyük ümidlər vəd edən başqa bir yetirməsini – Ansu Fatini xatırlamağa başladılar. İspaniyalı yeniyetmə yaşlarında Kataloniya klunun rəhbərliyini necə valeh etmişdisə, dərhal Messinin varisi adlandırmağa başlamışdılar – ona arzulanan “10 nömrəli” futbolkanı vermişdilər. Elə “transfermarkt” da hücumçunun oyunundan vəcdə gəlmişdi. Almaniya portalı 17 yaşlı futbolçuya 80 milyon avro qiymət qoymuşdu.

Ancaq həm “Barselona”nın, həm də “transfermarkt”ın analitikləri tələsib – tezliklə Ansunu zədələr incitməyə başladı, o, heyətdən kənarda qaldı, qiyməti aşağı düşdü. 22 yaşlı Ansu artıq 15 milyon avroya qiymətləndirilir, əməlli-başlı oynamır, daha çox müalicə alır.
Təkcə elə bu mövsüm Fati müxtəlif səbəblərdən “Barselona”nın 11 oyununu buraxıb. İspaniyalı “Brayton”da icarədə olduğu 2023/24 mövsümündə də zədə üzündən 14 oyundan kənarda qalıb.