Vinisius “Rayo Valyekano” fanatlarına hansı jesti göstərib?
La Liqa matçlarında tez-tez müxtəlif qalmaqalların iştirakçısı olan “Real”ın braziliyalı ulduzu Vinisius Junior son turdakı hərəkəti ilə yenə diqqət mərkəzinə düşüb.
“Real”ın “Rayo Valyekano” ilə səfərdə 3:3 bərabərə qaldığı matçın final fitindən sonra “sambaçı” meydanı tərk etmək üzrə olarkən “Kampo de Valyekas”dakı bəzi fanatlar onun ünvanına şüarlar qışqırdılar. Çılğın xarakteri ilə tanınan “sambaçı” isə bunun cavabında yerli fanatlara əli ilə bir jest göstərdi. O əvvəlcə iki barmağını, sonra da aşağı işarəsini göstərərək “sequndaya” sözünü qışqırdı. Vinisius bununla da “Valyekano”nun aşağı liqaya yollanacağına işarə vurdu. “Marka”nın iddiasına görə, İspaniya Kral Futbol Federasiyasının Nizam-İntizam Komitəsi həm bu məsələni, həm də fanatların Vinisiusa yönəltdiyi təzahüratları araşdırmaq qərarına gəlib. La Liqanın nümayəndələri bununla bağlı federasiyaya müraciət ünvanlayıblar.
Bu arada “Rayo Valyekano”nun prezidenti Raul Martin Presa da olaya biganə qalmayaraq bunları deyib: “Vinisiusun bizə qarşı bu cür hərəkəti və fanatlarımıza
“Rayo Valyekano”nun aşağı liqada oynamalı olduğuna işarə vurması çox yersizdi. Çünki elitada oynamaq hər baxımdan bizim üçün çox vacibdi. Bunun sayəsində “həyatda qalırıq”. Hətta bizim klubun da cəza alması gündəmdədi. Epizodu yenidən incələməliyik. Çünki fanatlarımız oyunboyu özünü çox yaxşı aparmışdı. Hərçənd kimsə təxribata uyaraq xoş olmayan bir söz deyirsə və ya meydana yad əşya atırsa, bu heç də yaxşı hal deyil. Qəribədi ki, buna görə də klub cəzalanır. “Rayo Valyekano”nun burda günahı nədi? Biz hər yerdə və həmişə hörməti itirməməliyik. Çünki futbol dünyasına pis bir şey arzulamaq düzgün deyil. Futbolçular da eyni şəkildə başqalarına hörmətlə yanaşmalıdı”.
Digər xəbərlər
