“Komandamızın mövsümdəki ən yaxşı oyunlarından biri idi. “Sabah” yaxşı təşkil olunmuş komandadı və çempionatın liderlərindəndi. Bilirdik ki, rəqibimiz kimdi. Amma fikrimcə, “Araz-Naxçıvan” oyunda diqtə edən tərəf idi. Yəni yaradılan qol vəziyyətlərinin sayına görə də rəqibdən üstün idik. Futbolçularımız əllərindən gələni etdilər ki, həm baxımlı oyun göstərsinlər, həm də yaxşı nəticə qazansınlar. Təəssüf ki, oyunun sonunda rəqib bir qol vuraraq bizi məğlub etdi. Bu da təbiidi. Bütün mövsümü məğlub olmadan keçirmək də mümkün deyil. Bunu da yaxşı dərk edirik. Xüsusilə də qarşımıza belə hədəf qoymamışıq ki, mütləq hansısa seriyanı davam etdirəcəyik. Xeyr, belə şey yoxdu. Futbolda da bunu sübut edə biləcək hansısa fakt mövcud deyil. Uzun müddət məğlubiyyətsiz davam etdik. Məğlub olduq deyə, üzülməyə, ruhdan düşməyə də dəyməz. Biz istənilən oyuna çıxanda mütləq qələbəyə köklənirik. Hər matça hədəfə çatmaq üçün bir məqam kimi baxırıq. Əsas hədəfimiz sonda mükafata qovuşmaqdı. Ən azı Konfrans Liqasına, Avroliqaya və bəlkə də Çempionlar Liqasına vəsiqə verən nəticələr istəyirik. Məqsədimiz yalnız budu. Amma hansısa seriyanı davam etdirmək və ya o qırılandan sonra ruhdan düşmək kimi fikrimiz yoxdu. Bu baxımdan komandamız möhkəm olmalıdı. Bu məğlubiyyət bizi daha da möhkəmləndirəcək. Ruhdan düşməyə dəyməz. Elə həmin gün də yaddan çıxdı və növbəti oyunu düşünürük. Oyunun idarəçiliyinə gəlincə, müəyyən məqamlarda biz də, məşqçilər də narazı qaldıq. Amma bunum üçün müvafiq qurumlar var və hakimlərin işinə də onlar qiymət verir. Biz bu məğlubiyyəti artıq qəbul edirik. O gündən yaddan çıxarmışıq. Məşqçilər korpusu da futbolçulara ancaq bunu tövsiyə etdi. “Araz-Naxçıvan” indiyəcən gözəl oyunu, əzmkarlığı və mübarizə əzmi ilə necə azarkeşlərini sevindirirdisə, bundan sonra da elə olacaq. Komandamızın gücünə əminik. İnanırıq ki, sonda da mövsümün əvvəlində qarşıya qoyulan hədəflərə çatacağıq. Bunu hər hansı xüsusi mənfi hal kimi qiymətləndirmək, uduzmağı çıxılmaz vəziyyətə çevirmək fikrində də deyilik. Qısa zamanda komanda toparlanacaq. Növbəti turda əsas rəqib “Qarabağ”la oyunumuz var. Həmin oyuna hazırlaşırıq. Komanda oyuna necə lazımdı hazırlaşacaq və tam yaxşı əhval-ruhiyyədə də meydana çıxacaq”.