Qış fasiləsi ərəfəsindəki axırıncıdan əvvəlki tur da maraqlı hadisələrlə zəngin oldu. Avrokubokların ardından təbiət də mübarizənin axarına damğa vurdu.

Əlbəttə, hava şəraiti üzündən “Şamaxı” – “Səbail” oyununun gec başlamasını nəzərdə tuturuq. Sırf yaşıl meydanda yaşanan hadisələrə gəlincə, “Araz-Naxçıvan”ın möhtəşəm seriyası bitdi, “Neftçi” çətin qələbə sayəsində bir pillə irəlilədi, “Səbail” Cavid Hüseynovla ilk xalını qazandı.

Tur qara görə 20 dəqiqə yubanan “Şamaxı” – “Səbail” matçı ilə start götürdü. Hər iki komandanın daim qol axtarışında olmasına baxmayaraq, qapılar toxunulmaz qaldı. Qazonun durumu da oyunun keyfiyyətinə təsir göstərdi. Futbolçular ara-sıra yıxılır, fasilələr yarandıqça ayaqları ilə meydandakı qarı təmizləməyə çalışırdılar. Sanki meydanda futbol yox, başqa bir oyun izləyirdik. Topu daha çox havada görürdük. Belə oyun tərzi də topun meydanı tez-tez tərk etməsi ilə nəticələnirdi. Hər halda, 1 xal qonaqları daha çox sevindirməlidi. “Şamaxı” isə artıq 10 oyundu qələbəyə həsrətdi. Doğrudan da, bu klubun rəsmiləri mövsümün əvvəlində gerçəyi deyirmiş: hədəf elitada qalmaqdı!

Turun mərkəzi oyununda nə baş verdi? “Araz-Naxçıvan”ın 15 oyunluq məğlubiyyətsizlik seriyasını “Sabah” qırdı. Üstəlik Muxtar Respublikanın təmsilçisi 6 tur idi qapısında qol görmürdü. Vasili Berezutskinin gəlişindən sonra “Sabah” dirçəlib və istənilən rəqibə çətin anlar yaşadır. Düzdü, bu dirçəlişin yeni baş məşqçi amili ilə bağlı olduğunu, yoxsa davamlı xarakter daşıyacağını tezliklə biləcəyik. Hər halda, “bayquşlar” rusiyalı çalışdırıcı ilə əvvəlcə “Səbail”i məğlub etdi, ardından “Turan Tovuz”u kubokdan uzaqlaşdırdı, “Qarabağ”la başa-baş mübarizə apardı və nəhayət, “qırmızı-ağlar”ın möhtəşəm seriyasını qıra bildi. Ədalət naminə, naxçıvanlıların məğlubiyyətə layiq olmadığını deməliyik.

Avrokuboklar vəsiqə uğrunda mübarizə aparan “Zirə” ilə “Turan Tovuz” əvvəldən axıra taktiki savaş apardı. Bu komandaların 2-ci duelində qalib müəyyənləşmədi. “Zirə” Tovuzdan məğlub ayrılmışdısa, evdə xal qazana bildi. Əslində bu nəticə hər iki tərəfi razı saldı. “Qartallar” hədəfindən uzaq düşmədisə, “bozqurd” da ili ilk “3-lük”də bitirməyi təminat altına aldı.

Vaxtilə ölkə futbolunda “at oynadan”, indi isə autsayderlər sırasında olan “Neftçi” ilə “Kəpəz” bakılıların meydanında qarşılaşdı. İlk hissədə rəqib qapısından 2 top keçirən “Neftçi” fasiləyə üstün yollandı. Amma 2-ci hissədə oyunun axarı tam dəyişdi. “Ağ-qaralar” heç nədən panika yaşamağa, səhvləri sıralamağa başladılar. “Neftçi”nin qapısına qol vurmaq üzrə “ixtisaslaşan” Orxan Məmmədov 77-ci dəqiqədə qollardan birinin əvəzini çıxsa da, “Kəpəz” məğlubiyyətdən qaça bilmədi. “Neftçi” bu qələbə sayəsində turnir cədvəlində “Şamaxı”nı arxada qoydu.

Turun son oyununda “Qarabağ” “Araz-Naxçıvan”ın “Sabah”a uduzmasından yararlanmağa çalışacaqdı və bunu asanlıqla bacardı. Nəticədə zirvə yenə ağdamlıların oldu. Sadəcə, “Sumqayıt” “köhlən atlar” qarşısında çox tez “ağ bayraq qaldırdı”. Prinsipcə “Qarabağ”ın üç qol vurduğu ilk yarıdan sonra oyunun final fitini səsləndirmək olardı. Amma futbol qaydaları buna imkan vermir. Sona qədər oynamaq lazım idi. Nədənsə Vaqif Cavadov fasilədə futbolçularının qəlbinə nüfuz etmək üçün yarayan sözlər tapa bilmədi.

Oyun bərpa olunandan sonra daha iki qol vuran “Qarabağ” fərqi biabırçı həddə çatdırmaqla yanaşı, turun məhsuldarlıq göstəricisini də yetərincə yaxşılaşdırdı. Axı ilk 4 oyunda cəmi 4 qol vurulmuşdu.

Misli premyer-liqası
2-ci dövrə, 17-ci tur
14 dekabr
Şamaxı – Səbail 0:0
Araz-Naxçıvan – Sabah 0:1
15 dekabr
Zirə - Turan Tovuz 0:0
Kəpəz –Neftçi 2:1
16 dekabr
Qarabağ – Sumqayıt 5:0

ƏSƏD SEYİDOV