Misli premyer-liqasını 15-ci turu hadisə baxımından zəngin oldu.

Sadalamağa başlasaq, bir əlin barmaqları yetməz. “Araz-Naxçıvan” fenomenindən, “Kəpəz”in sonuncu pilləni “Səbail”ə təhvil verməsindən tutmuş “Sabah”ın qələbəsiz seriyaya son verməsinə, “Şamaxı”nın belə seriyanı davam etdirməsinə qədər. Azərbaycan derbisinin gözəllikləri də öz yerində! Stadiona yetərincə çox azarkeş toplaşdı və “Neftçi” onların gözü önündə növbəti dəfə darmadağın oldu. Hesab oyunun axarına uyğun gəlməsə də, reallıq budu ki, “Qarabağ” artıq hər oyunda əzəli rəqib üzərində əzici üstünlük qurur.

Tur “Araz-Naxçıvan” – “Turan Tovuz” oyunu ilə start götürdü. “Qırmızı-ağlar” minimal qələbə sayəsində qısa müddətə zirvəyə yüksəldi. Elmar Baxşıyevin yetirmələri məğlubiyyətsiz oyunlar seriyasını 14-ə çatdırdı. Bu komandaların ilk görüşü 7-ci tura təsadüf etmiş, “Araz-Naxçıvan” həmin vaxt “Turan Tovuz”a ilk dəfə məğlubiyyət acısı yaşatmışdı. Yeri gəlmişkən, onda da qələbə topunu Felipe Santos vurmuşdu. “Araz-Naxçıvan” 3-cü pillədəki tovuzlularla xal fərqini açdısa, lider “Qarabağ”ı da addım-addım izləyir.

“Sabah” 7 oyunluq qələbəsiz oyunlar seriyasına Vasili Berezutskinin gəlişindən sonra son qoydu. Onun gəlişinin “Sabah” üçün dirçəliş imkanı olacağını söyləmək üçün hələ tezdi. Şahin Diniyev getdi, Cavid Hüseynov gəldi, amma “Səbail”də heç nə dəyişmədi. Prinsipcə məğlubiyyətləri sıralamağı elə Diniyev də bacarırdı. Hüseynov isə təkcə məğlubiyyətləri yox, şikayətləri də sıralayır. Daha bunun fərqi nə oldu ki?!

Turdan qazanclı çıxan klublardan biri də “Kəpəz”di. Azər Bağırov gələndən sonra 3-cü qələbəsini qazanan “sarı-göylər” turnir cədvəlindəki sonuncu pillədən qurtuldu. “Kəpəz” bu qələbə hesabına “Neftçi” ilə “Şamaxı”ya bir qədər də yaxınlaşdı. Mövsümə yaxşı start verən komandalardan biri də “şirlər” idi. Amma Ayxan Abbasovun komandası 8 turdu qələbə qazana bilmir. Baş məşqçi isə çıxış yolunu yeni transferlərdə görür.

“Zirə”nin “Sumqayıt”ı darmadağın etməsi böyük marağ doğurdu. Axı “qartallar ötən tur autsayderə məğlub olmuşdu… Görünən odu ki, Sadıqovun yetirmələri bu matça xüsusi diqqət yetirib. Meydanda gürcüstsanlı hücumçu Davit Volkovun göstərdiyi “şou” öz yerində. Hesabın darmadağın həddinə çatmasında “Zirə”dən Davit Volkov, “Sumqayıt”dan is, Ayxan Süleymanlı böyük rol oyandı. Ayxanın “qartallar”da iki gürcüstanlı futbolçu – Volkov və Papunaşvilinin fərqlənməsində rolu böyük idi. Bununla belə, Ayxan 61 dəqiqə meydanda qaldı.

Tura Azərbaycan derbisi ilə yekun vuruldu. “Neftçi” ötən tur avrokuboklar uğrunda mübarizə aparan “Zirə”ni məğlub etmişdi. “Qarabağ”la oyuna hazırlaşmaq üçün bundan gözəl motivasiya ola bilməzdi. Hətta “Qarabağ”ın doğma azarkeşləri qarşısında Avropa Liqasında darmadağın olması “ağ-qaralar” üçün xüsusi fürsət idi. Bütün bu məqamlara rəğmən, “Neftçi” darmadağın olundu.

Misli premyer liqası
1-ci dövrə, 15-ci tur
29 noyabr
Araz-Naxçıvan – Turan Tovuz 1:0
Sabah – Səbail 1:0
30 noyabr
Şamaxı – Kəpəz 0:1
Zirə - Sumqayıt 4:1
1 dekabr
Neftçi – Qarabağ 0:3

ƏSƏD SEYİDOV