Noyabrın 30-da Libertadores Kubokunun (LK) finalı keçirildi.

Bununla da Cənubi Amerikanın ən nüfuzlu klub turnirinin 2024-cü il mövsümü sona çatdı.

final
Atletiko Mineyro - Botafoqo 1:3 (0:2)
Atletiko Mineyro (Belu Orizonte, Braziliya): Everson, Alonso, Gilyerme Arana, Voynoviç (Mariano, 46), Battalya, Qustavo Skarpa (Varqas, 46), Franko, Vera (Bernard, 46), Halk, Deyverson (Alan Kardek, 76), Paulinyo.
Botafoqo (Rio de Janeyro, Braziliya): Con, Aleks Telles (Marsal, 58), Adrielson, Barbosa, Vitinyo, Qreqore, Marlon Freytas, Almada (Junior Santos, 79), Savarino (Danilo Barbosa, 58), Luis Enrike (Mateus Martins, 79), İqor Jezus (Allan, 90+3).
Qollar: Luis Enrike, 35 (0:1). Aleks Telles, 44-p. (0:2). Varqas, 47 (1:2). Junior Santos, 90+7 (1:3).
Vərəqələr: Battalya, 30. Voynoviç, 45+1. Vera, 45+2. Aleks Telles, 45+3. Almada, 79. Halk, 90+2. Vitinyo, 90+4. Junior Santos, 90+9 - sarı. Qreqore, 2 - qırmızı.
Hakim: Fakundo Telyo (Argentina).
30 noyabr. Buenos Ayres. 69803 tamaşaçı.

LK-nın tarixində 6-cı, son 5 ildə isə 4-cü (!) dəfə həlledici matçda Braziliya klubları qarşılaşdılar. Artur Jorjenin çalışdırdığı “Botafoqo” yarımfinalda iki oyunun (5:0, 1:3) nəticəsinə əsasən “Penyarol”u (Uruqvay) mübarizədən kənarlaşdırmışdı. “Atletiko Mineyro” isə finala çıxmaq üçün “River Pleyt” səddini keçmişdi. Argentinalı Qabriel Militonun komandası evdə Argentina nəhəngini 3:0 hesabı ilə məğlub etməklə finalın qapısını açmış, yarımfinalın cavab görüşündə isə hesab açılmamışdı.

Beləliklə, “Atletiko Mineyro” finalda tarixində ikinci cəhdində ikinci, ilk dəfə həlledici mərhələyə çıxan “Botafoqo” isə birinci dəfə turnirin qalibi olmağa çalışacaqdı. Xatırladaq ki, “Atletiko Mineyro” LK-da ilk zəfərini 2013-cü ildə reallaşdırmışdı. 11 il əvvəlki finalda Paraqvay “Olimpiya”sı ilə hər iki oyun ev sahiblərinin 2:0 hesablı qələbəsi ilə nəticələnmiş, Braziliyadakı həlledici matçdan sonra labüd olan penalti seriyasında meydan sahibləri üstün olmuşdu (4:3). Bu dəfəki finalın favoriti Braziliya çempionatında finişə iki tur qalmış lider olan “Botafoqo” idi. Maraq üçün “Atletiko Mineyro”nun A seriyasının 36-cı turundan sonra 10-cu yerdə olduğunu və liderdən 29 xal geri qaldığını da qeyd edək.

Argentinanın paytaxtı Buenos Ayres şəhərindəki “Monumental” stadionunda keçirilən final favorit üçün çox pis başladı.

Argentinalı referi Fakundo Telyo start fitini yenicə çalmışdı ki, cibindən birbaşa qırmızı vərəqəni çıxarmalı oldu: yarımmüdafiəçi Qreqore ayağı ilə rəqibin başına zərbə endirdiyi üçün dərhal meydandan qovuldu. Başqa sözlə, “Botafoqo” artıq 2-ci dəqiqədə on nəfərlə mübarizə aparmağa məcbur idi. Rəqib matçın lap əvvəlində say üstünlüyü qazandığı üçün təşəbbüsə yiyələnmək imkanına malik oldu. Topa böyük ölçüdə sahib olan “Atletiko Mineyro”nun həmlələrini dəf edən “Botafoqo” inanılmaz əzmkarlıq nümayiş etdirdi. Artur Jorjenin komandası 35-ci dəqiqədə Luis Enrike ilə hesabı açmağı bacardı. Bununla kifayətlənməyən rio de janeyrolular fasilə ərəfəsində penalti vurmaq imkanı da qazandılar: Aleks Telles komandasının üstünlüyünü iki topa çatdırdı.

Amma fasilədən az sonra fərq minimuma endi: Varqas Halkın ötürməsi ilə “atletlər”i ümidləndirdi. Militonun komandası bundan sonra daha böyük qüvvə ilə hücuma atılmağa başladı. Azlıqda qalan rəqibin sıx müdafiə olunmaqdan və növbəti əks-hücumda qapıya yol tapmağa çalışmaqdan başqa variantı yox idi. Qeyd edək ki, “Atletiko Mineyro”nun qapıya endirdiyi əksər zərbələr hədəfdən aralı keçirdi. Maraqlı fakt isə o oldu ki, “Botafoqo”nun qapıya yönələn 3-cü zərbəsi də qol oldu! Meydana sona yaxın çıxan Junior Santosun son saniyələrdə hesabı 3:1-ə çatdırması qalibin kimliyinə şübhə yeri qoymadı. Beləliklə, baş məşqçi vəzifəsinə aprelin 3-də təyinat alan Artur Jorje “ağ-qaralar”ı regionun klub futbolunun zirvəsinə yüksəltdi: 52 yaşlı portuqaliyalı mütəxəssisin başçılıq etdiyi komanda LK-da ilk dəfə çempion oldu! Rio de Janeyro klubu həm Cənubi Amerika Superkuboku matçında Sudamerikana Kubokunun son qalibi “Rasinq”ə (Argentina) rəqib oldu, həm də gələn yay keçiriləcək Klublararası Dünya Çempionatında regionu təmsil etmək hüququ qazandı.

Bombardirlər: Junior Santos (Botafoqo RJ) – 10, Paulinyo (Atletiko Mineyro) – 7, Silvera (Penyarol), Borxa (River Pleyt) - 6.