''Əslində ötən həftəyə qədər komandada gözəl ab-hava hökm sürürdü. Ardıcıl 5 qələbə qazanılmışdı. Amma derbidə ''Beşiktaş''a məğlubiyyətdən sonra yenə hər şey əvvəlki kimi oldu. Hətta əvvəlkindən də pis durum yaranıb. Çünki artıq azarkeşlər də etiraz səsini ucaltmağa başlayıb. Fikrimcə, irəlidə bizi bundan da çətin günlər gözləyir. ''Atletik''lə oyuna yaxşı, aqressiv, coşqulu başlamışdıq. Amma kobud səhv hər şeyi məhv etdi. Avrokubok matçında bu cür səhvdən sonra geri dönmək çətin olur. Samet Akaydın tənqid olunmağa layiqdi. Son oyunlarda buraxılan qollarda onun səhvləri var. Böyük çətinliklə oynamaq şansı qazanmışdı. Amma bu şansı bu cür dəyərləndirən bir futbolçunun azarkeşlər tərəfindən sevilməsi mümkün deyil. Mən ümumiyyətlə, bundan sonra ona şans veriləcəyini düşünmürəm. Bu, birinci kobud səhvi deyil. Əvvəllər də buna bənzər səhvləri olub. Düzdü, mənim oynadığım zamanlarda evdəki derbilərdə fasiləyə geridə yollanmırdıq. Mən Kadıköydə derbilərdə 15 il məğlubiyyət görmədim. Fasiləyə geridə və ya bərabərliklə yollandığımız oyunlarda hər kəsin əli-ayağı titrəyirdi. Çünki başqanın paltardəyişmə otağına gələcəyini bilirdik. Bizim dönəmimizdə yerli futbolçuların da nüfuzu daha çox idi. Təcrübəli yerli futbolçulardan qorxurduq. Düzdü, bizi döymürdülər. Amma onlardan müəyyən dərəcədə çəkinirdik''.