''Fənərbaxça'' və Türkiyə yığmasında qəribə bir durum yaranıb.

Samet Akaydın klubda oynamasa da, yığmaya daimi olaraq dəvət almaqda davam edir. Təcrübəli müdafiəçi hələ ötən mövsümün ilk dövrəsində ''Fənər''də gözdən düşmüşdü. Nəticədə ikinci dövrədə Fatih Terimin həmin dönəm baş məşqçisi olduğu ''Panatinaikos''a icarəyə verilmişdi. Samet bu yay geri döndükdən sonra Joze Mourinyonun da gözünə girə bilmədi. Onun komandadan ayrılacağı barədə xəbərlər dolaşsa da, Samet nədənsə, ''Fənər''də qaldı.

30 yaşlı müdafiəçi bu mövsüm bir dəqiqə də olsun, oynamayıb! Onun yalnız 3 superliqa və 2 avrokubok matçında adı iştirak ərizəsinə salınıb. Belə olan halda bu futbolçunun yığmaya dəvət alması haqlı olaraq Türkiyə futbol ictimaiyyətində müzakirələrə səbəb olub. Samet sentyabrda da yığmaya çağırılmışdı. Amma həmin vaxt o, Uels və Monteneqro ilə oyunlarda iştirak etməyərək ehtiyatda qalmışdı.

Yığmanın baş məşqçisi Vinçentso Montella Akaydını hələ ''Adana Dəmirspor''u çalışdırdığı dönəmdən gözəl tanıyır. Ola bilər ki, bu məqam da Montellanın onu yığmaya çağırmasında müəyyən rol oynayır. Ancaq italiyalı mütəxəssis də onun daimi oyun praktikasına malik olacağı bir kluba keçməsini istəyir.

Samet Akaydın 2023-ün yanvarında Adana klubundan 3,7 milyon avro qarşılığında ''Fənər''ə gəlib. Onun bu mövsümün qış fasiləsində komandadan ayrılacağı gözlənilir.

ƏLİ