Bu günlərdə uğursuz nəticələrə görə Fatih Terimlə yollarını ayıran ''Panatinaikos''da daha bir diqqətçəkən olay yaşanıb.

Bu dəfə hadisələrin mərkəzində türkiyəli futbolçu Samet Akaydın yer alıb. Bilindiyi kimi 19 may Türkiyədə Atatürkü anma, Gənclik və İdman Bayramı kimi qeyd olunur. Həmin gün Atatürklə bağlı paylaşımlar edilir. Samet Akaydın da öz ''instaqram'' səhifəsinin hekayə bölümündə bununla bağlı paylaşım etdi. Amma onun bu paylaşımı qalmaqala səbəb oldu. ''Panatinaikos'' rəsmiləri təcrübəli futbolçudan paylaşımı silməyi tələb etdilər. Samet bu tələbi geri çevirdiyi üçün ''Panatinaikos''da əsas komandadan kənarlaşdırıldı!

Akaydın bu durumu müqavilə ilə bağlı olduğu ''Fənərbaxça''ya bildirdi. Onun ən qısa müddətdə Türkiyəyə qayıdacağı gözlənilir. Afina nəhəngi 30 yaşlı futbolçunu yanvarın sonlarında Terimin istəyi ilə ''Fənər''dən 6 aylıq icarəyə götürmüşdü. ''Panatinaikos''un mövsüm bitdikdən sonra 4 milyon avro ödəyərək Akaydını daimi əsasda transfer etmək hüququ var idi. Amma zatən Terim ayrıldıqdan sonra Sametin Yunanıstan klubunda qalmayacağı şübhə doğurmurdu. Türkiyə yığmasına da daimi olaraq dəvət alan bu futbolçu ''Panatinaikos''da 15 rəsmi oyuna çıxaraq aktivinə 1 məhsuldar ötürmə yazdı.

Xatırladaq ki, Terim ''Pana''nın 2010-dan bu yana davam edən çempionluq həsrətinə son qoya bilmədi və komanda mövsümü 4-cü pillədə başa vurdu. Amma afinalıları qarşıda hələ ölkə kubokunun finalı da gözləyir.

ƏLİ