“Şamaxı”nın kapitanı Adillə Georginin dedikləriylə razıdımı? – özü açıqladı
Tarix ərzində Azərbaycanda ən güclü zəlzələlər Şamaxıda baş verib. Elə eyniadlı komandada da durum belədi. Futbolumuzu sarsıdan növbəti hadisə bu klubla bağlıdı.
Dəqiq desək, komandadan uzaqlaşdırılan Georgi Kantariya və Adil Nağıyevin adı danışılmış oyunlarda hallanır. Futbolçular isə iddiaları rədd edir. Ayrılığın səbəbini Kantariya kollektivdə münaqişə və nizam-intizam problemlərinin olmasıyla, Adil isə Kantariya ilə dalaşmasıyla izah edir.
Bir çox məqam da var ki, xəbər lentimizdə bu haqda bilgilər yerləşdirmişik və mövzunu davam etdirəcəyik. İndi isə futoblçuların nə dərəcədə səmimi danışdığını aydınlaşdırmaq lazımdı. “Football-plus.az” bu məqsədlə “Şamaxı”nın kapitanı Səbayıl Bağırova müraciət etdi. O, iddialar haqda belə dedi:
“Kim nə deyir, özü bilər. Düzü, bu haqda həmin futbolçularla söhbət etmək lazımdı. Onların açıqlamalarıyla tanışam. Mən onu deyə bilərəm ki, komandada hər şey yaxşıdı. Hər oyuna məsuliyyətlə hazırlaşırıq. Hansısa narazılıqdan söhbət gedə bilməz. Ümumi vəziyyətlə bağlı klubumuz rəsmi açıqlama yayıb. Növbəti matçlara hazırlaşırıq. Komanda daxilində ab-hava qaydasındadı. Yəqin ki, qarşıdakı günlərdə bütün məqamlara aydınlıq gələcək və biz də nə baş verdiyini biləcəyik. Özümüz isə diqqətimizi premyer-liqaya yönəltmişik. Allahın izni ilə öhdəmizə düşəni edəcəyik”.
KƏNAN BAHADIR
Digər xəbərlər
