''Trabzonspor'' səfər sindromuna İstanbulda son qoymağa çalışacaq

Türkiyə çempionatında həftəsonu ''Trabzonspor'' lider ''Qalatasaray''ın qonağı olacaq. Tarixinin ən uğursuz startlarından birinə imza atan Trabzon təmsilçisi aşkar autsayder sayılır.

Təkcə bir faktı vurğulayaq ki, ''bordo-mavilər''in bu mövsüm hələ də səfər qələbəsi yoxdu. Komanda rəqib meydanlarında keçirdiyi 7 oyundan 4 heç-heçə, 3 məğlubiyyətlə ayrılaraq 21 mümkün xaldan yalnız 4-nü toplayıb. ''Trabzonspor'' daxili birincilikdə son səfər qələbəsini 212 gün öncə - mayın 18-də, yəni ötən mövsümün 37-ci turunda ''İstanbul BŞ'' ilə oyunda əldə edib (1:0). Şenol Günəşin komandası bu dəfə də uduzacağı təqdirdə hətta düşmə zonasına qədər geriləyə bilər.

Bundan başqa ''Trabzonspor'' İstanbul nəhənglərinə qarşı 5 oyunluq qələbəsiz seriyaya da son qoymağa çalışacaq. Komanda nəhənglər üzərində son qələbəsini ötən ilin noyabrın 4-də səfərdə ''Fənərbaxça'' ilə oyunda qazanıb (3:2).

ƏLİ