“Reallıq odu ki, bu gün Avropa çempionatı səviyyəsində çıxış edəcək futbolçularımızın sayı azdı. Ümumiyyətlə qıtlıqdı, bu öz yerində. Amma millimizdə belə ciddi turnirdə özünü yaxşı tərəfdən göstərə biləcək qızların sayı 5 və ya 6-dı. Təsəvvür edin ki, meydana azlıqda çıxırsız. Ən əsası, hücumçu tapa bilmirik. Elə oyunlar oldu ki, ön xətdə yarımmüdafiəçinin xidmətindən yararlandıq. Təəəsüf ki, vəziyyət belədi. Əlimizdə olan material budu. İnanın ki, İsveçrəyə qarşı açıq oynasaq, bizə azı 15 qol vurardılar. Bu komanda ötən il Cənubi Kiprin qapısından 15 qol keçirib. Cənubi Kiprlə oyunda da hücum futbolu oynamağa çalışdıq. Sonuncu matç idi. Futbolçularımdan baxımlı oyun tələb etdim. Bəlkə sırf müdafiə olunmağa köklənsəydik, bir xal qazana bilərdik”.

“Əslində U-17 millimizdə çox bacarıqlı oyunçular var. İstəyirəm ki, onları U-19 yığmamıza cəlb edək. Belə ciddi turnirlərdə iştirak etsinlər. Təcrübə toplasınlar. İnkişaf etmək istəyiriksə, U-19-u gücləndirməliyik. Belədə əsas milliyə futbolçu verə bilərik. Mən təklif edəcəm ki, U-17 və U-19-un ən bacarıqlı futbolçularını birləşdirək”.