Bakteriya ''Real''ın 19 yaşlı üzvünün karyerasına son qoydu!
''Real''ın akademiyasında yetişən ən istedadlı və parlaq futbolçulardan olan, gələcəyin Xabi Alonsosu sayılan Mark Kukalon çox dramatik bir şəkildə 19 yaşında futbolla vidalaşmalı olub.
Gənc yarımmüdafiəçi ''Real''ın akademiyasına 2016-cı ildə ''Saraqosa''nın akademiyasından gəlmişdi. Kukalon 2022-ci ilin sentyabrın 6-da UEFA Gənclər Liqasında ''Seltik''lə oyunda çox ciddi zədə almış və onun diz bağı qopmuşdu. Bu hadisədən bir müddət sonra o, ''Real''ın bazası Valdebebasda yerləşən tibb mərkəzində əməliyyat olunmuşdu. İlk öncə əməliyyatın uğurlu keçdiyi və Kukulonun maksimum 9 aydan sonra futbola qayıdacağı güman edilirdi. Amma müalicə uzanınca və ağrılar artdıqca klub həkimləri məsələni araşdırmağa başladılar. Məlum oldu ki, əməliyyat zamanı Kukulonun dizinə bakteriya düşübmüş və bu da infeksiyanın yaranmasına səbəb olub. Həkimlər bir ildən artıq onun ayağını sağaltmağa çalışsalar da, bu, mümkün olmadı. Bir daha futbol oynaya bilməyəcəyini anlayan Kukulon həkimlərin məsləhəti ilə dünən karyerasını rəsmən bitirdiyini açıqladı:
''Zədədən sonra vəziyyət ağırlaşdığından başqa çarəm qalmadı. Bu çətin qərarı verməli oldum. Son iki ildə yenidən futbola qayıtmaq və bu oyundan zövq almaq üçün əlimdən gələn hər şeyi etdim. Hər halda mənə dünyanın ən yaxşı klubunda yer almaq və arzularla yaşamaq qismət oldu. Bu müddət ərzində çox şey öyrəndim və bir insan kimi böyüdüm. Futbol və zəfərlər mənə çətinliklərin öhdəsindən gəlməyi öyrətdi''.
Kukulonun karyerası yalnız Gənclər Liqasında keçirilən 4 oyundan ibarət oldu.
ƏLİ
Digər xəbərlər
