Hələ bir neçə il əvvəl ortaya çıxan ideya bu il reallaşmayacaq. İspaniya La Liqasının 18-ci turunun “Barselona” – “Atletiko” matçı ABŞ-də keçirilməyəcək.

Bu məlumatı “Sport” qəzeti yayıb. Bir müddət əvvəl matçın Mayami şəhərində təşkili planlaşdırılmışdı. Lakin çempionat oyunu Barselonada keçiriləcək. La Liqanın prezidenti Xavyer Tebas hesab edir ki, indiki şəraitdə Valensiya və ətraf ərazilərdə baş verən təbii fəlakətlər fonunda İspaniya çempionatının bəzi oyunlarını ABŞ-də keçirməyin vaxtı deyil. Yerli federasiyanın rəhbərliyi də indi başqa prioritet vəzifələrin olduğunu düşünür. Məsələn, daşqın səbəbindən matçların kütləvi təxirə salınması fonunda ölkə kubokunun təqviminə yenidən baxılması zərurəti ortaya çıxıb. Bundan başqa, matçların başqa ölkədə keçirilməsinə razılıq verməli olan İspaniya Kral Futbol Federasiyası da daimi prezidentin olmaması səbəbindən çətin vəziyyətlə üzləşib.

Buna baxmayaraq, federasiyanın idarə heyəti İspaniya çempionatının oyunlarının ABŞ-də keçirilməsi ideyasından birdəfəlik əl çəkməyib. Bəzi mənbələrə görə, “Barselona” və “Atletiko” arasında sonrakı matçlar gələn il Mayamidə keçirilə bilər. Maraq üçün qeyd edək ki, Kataloniya klubu madridlilərlə matçı ABŞ-də oynamaqla təxminən 6 milyon avro qazanacağına ümid edirdi.