“Neftçi” səfərdə “Sabah”la heç-heçəyə razılaşdı.

Qolsuz bərabərlikdən sonra “ağ-qaralar”ın müdafiəçisi Yuri Matias bəzi suallarımızı cavabladı.

- Qolsuz heç-heçəni necə dəyərləndirirsən?
- Düşünürəm ki, ədalətli nəticə alındı. Çünki oyunu iki hissəyə bölmək olar. Birinci hissədə bizim komanda yaxşı çıxış etdi. İkinci hissədə isə əksinə, rəqib daha üstün idi. Hər iki tərəf qələbə üçün çalışırdı. Meydanda bşabaş mübarizə getdiyini deyə bilərəm. Buna görə də ən ədalətli nəticə elə heç-heçə idi.

- 79-cu dəqiqədə sarı vərəqəyə görə etiraz etdin. Hətta hakim mümkün penaltini yoxlamaq üçün monitora yaxınlaşanda olduqca emosianal reaksiya göstərdin. Penalti verilmədi, bəs narazılığın nəyə oldu?
- Bu şeylər futbolda normaldı. Mənim o cür reaksiya verməyim emosionallıqla bağlı idi. Həmin epizodda təhlükəli oynamadığımı bilirdim. Orda nə penaltı var idi, nə də mənə sarı vərəqə düşürdü. Bunu bildiyim üçün belə reaksiya verdim. Hakim də mənə "sarı" verdi. Amma VAR-a baxandan sonra gördü ki, səhv qərardı, düşünürəm ki, bunu nəzərə alıb sarı vərəqəni geri götürə bilərdi.

- Bu dəfə də meydanda derbi ab-havası vardı.
- İstər "Neftçi", istərsə də "Sabah" yaxşı heyətə malik komandadı. Hər ikisi yüksək yerlər uğrunda mübarizə aparır. Əlbəttə, hər bir futbolçu istər ki, belə derbi atmosferli oyunlarda iştirak etsin, çox oynasın. Biz "Neftçi" olaraq, belə oyunlarda çıxmağa artıq öyrəncəliyik. "Neftçi"nin çox böyük azarkeşləri var - istər evdə, istərsə də səfərdə bizə dəstək olurlar. Ümumilikdə çox yaxşı atmosfer var idi. İndi nəticələrimizi daha da yaxşılaşdırmağa çalışırıq. Buna görə də hansısa rəqibi xüsusi qeyd edə bilmirəm. Sabah başımıza nə gələcəyi bilinmir. Biz sona qədər vuruşacağıq.

- “Neftçi” həm nəticələrinə, həm də oyununa görə mövsümün əvvəlindən tənqid olunur. Amma Samir Abasovun gəlişindən sonra sanki siz futbolçularda da canlanma var.
- Əlbəttə, baş məşqçimiz gəldiyi gündən çalışır ki, öz fəlsəfəsini yeritsin, bildiklərini öyrətsin. Tələblərini bizə çatdırır. Yeni məşqçidi, yeni tələbləri var. Ona görə də düşünürəm ki, bir müddət sonra daha yaxşı çıxış edəcəyik.

- Bəs Roman Qriqorçukla Samir Abasovu necə necə müqayisə edərdin?
- Hər məşqçinin özünə uyğun fəlsəfəsi, futbola baxışı var. Biz də futbolçu olaraq, bu gün burdayıq, sabah başqa yerdə ola bilərik. Hər məşqçinin nə tələbi varsa, çalışmalıyıq onu yerinə yetirək.

- "Neftçi"nin premyer-liqadakı hədəfi nədi?
- Çempionata yaxşı başlamadığımıza görə ən yüksək hara qədər gedə biləriksə, ora qədər irəliləyəcəyik.

- Bəs kuboku qazanmaq hədəfi var?
- Harda oynayırıq-oynayaq, hədəflərimiz böyükdü. Hər oyunda əlimizdən gələni etməyə çalışacağıq.

RÖYANƏ OĞUZ