"Zirə" Misli premyer-liqasının 28-ci turunda səfərdə "Sabah"ı 1:0 hesabı ilə məğlub edib

"Football-plus.az" xəbər verir ki, "qartallar"ın baş məşqçisi Rəşad Sadıqov matçdan sonra keçirilən mətbuat konfransında jurnalistlərin suallarını cavablandırıb:

- Əvvəlki dövrlərdə də "Sabah"la aramızda baxımlı oyunlar olmuşdu. Bu gün də yaxşı, gərgin mübarizə şəraitində keçən matç oldu. Hər iki komanda qələbəyə layiq idi. Biz son vuruşlarda bir az uğurlu olduq. Vacib 3 xal qazandıq. Turnir cədvəli o qədər sıxdı ki, qazanılan hər 3 xal qızıla bərabərdi. Sevinməyə çox vaxtımız yoxdu. Üç gün sonra bizi vacib kubok matçı gözləyir.

- Avrokuboklara vəsiqə qazanmaq üçün çempionat, yoxsa kubok daha əlverişlidi?
- Fərq qoymuruq. Hər ikisi bizim üçün çox önəmlidi. Həmişə qarşıdan gələn oyunu fikirləşirik.

- İlk hissədə "Sabah"ın qol epizodları oldu. İkinci hissədə isə komandanız boşluq vermədi. Fasilədə hansı tapşırıqları verdiz?
- Eyni tapşırıqlar idi. İkinci hissədə də "Sabah"ın təhlükəli hücumları oldu. Böyük qüvvə ilə irəli atılanda onların müdafiəsində boşluqlar yaranırdı. Bizim istəyimiz həmin boşluqlardan istifadə edib ikinci qolu vurmaq idi. Son dəqiqələr bizim üçün gərgin keçdi.

- Yeni transferiniz Araz Abdullayev məşqlərdə özünü necə göstərir?
- Gözlədiyimdən daha yaxşı Arazdı. Uzun müddətdi futboldan kənarda qalıb. Çalışacağıq ki, formasını bərpa etsin. Araz istedadlı futbolçularımızdandı. Onu klubsuz görmək hamımız üçün məyusedicidi.

- "Zirə"dən AFFA İcraiyyə Komitəsinin üzvlüyünə namizəd yoxdu. Bunun səbəbi nədi?
- Bu, mənim səlahiyyətimdə olan məsələ deyil. Bu barədə məlumatsızam. Elə sıx qrafikdəyik ki, heç özümüzə ayırmağa vaxtımız yoxdu.

- Sizin namizədliyiniz irəli sürülsəydi, razı olardız?
- Düşünürəm ki, mənim üçün tezdi. Özümü isbatladıqdan sonra gələcəkdə belə təklif olsa, dəyərləndirə bilərik.