Oktyabrın 11-13-ü aralığında Millətlər Liqasında 3-4-cü turların 24 oyunu keçirildi.

Təəssüf ki, yığmamız növbəti məğlubiyyətlə azarkeşlərini üzdü. Qalan komandaların çıxışına gəlincə, Portuqaliya, Yunanıstan və Rumıniya itkisiz irəliləyir. Türkiyə yığması da 3 oyundan sonra 7 xalla turnir cədvəlinin zirvəsində qərarlaşıb. Ukrayna – Gürcüstan oyununun nəticəsi də maraq doğururdu. Axı ukraynalılar ilk iki oyunda uduzmuş, qonşularımız isə qalib gəlmişdi. Postsovet məkanı derbisindən Ukrayna qalib ayrıldı.

Ronaldo rekordları, Portuqaliya qələbələri sıralayır
Xorvatiyanın heç də gənc olmayan yığması oyunboyu Şotlandiyanı təzyiq altında saxlasa da, 33-cü dəqiqədə çox qəribə qol buraxdı. Qonaqların əks-hücumu zamanı top cərimə meydançasında Luka Suçiçin ayağından səkdi, belədə Kristi dərhal qapını nişan aldı. Onun zərbəsindən sonra Çaleta-Sar çox çalışsa da, topun qapıdan keçməsinin qarşısını ala bilmədi. Amma xorvatlar bərabərlik qolunu çox tez vurdu. Qvardiolun uzun diaqonal ötürməsindən sonra təcrübəli Perişiç topu penalti nöqtəsi həndəvərində olan Matanoviç üçün saxladı. 21 yaşlı hücumçu milli komandada qol hesabına açdı. Bu futbolçu Hamburqda doğulub və U-19-a qədər Almaniyanın müxtəlif yaş qrupu üzrə yığmalarının şərəfini qoruyub. İkinci bundesliqada özünə ad-san qazanıb, gənclər yığması səviyyəsinə yüksələndən sonra tarixi vətəninin yığmasında çıxış etməyə qərar verib. Və budu, “Ayntraxt”ın əsas heyətində möhkəmlənəndən sonra milli komandaya dəvəti haqq edib. Gənclər öz yerində, veteranlar da “damalılar”ın qələbəsi üçün əlindən gələni etdi. Modriç yenə ən yaxşılardan idi, Xorvatiyanın 2-ci qolunu isə əvəzlənmə ərəfəsində Kramariç vurdu. Düzdü, qonaqlar da məğlubiyyətdən qurtulmağa çox yaxın idi. Onlar iki dəfə əlverişli imkanı qaçırdı, 5-ci uzatma dəqiqəsində top tora düşəndə isə VAR ofsayd qeydə aldı.

Bu qrupun digər oyununda Polşa Portuqaliyanı qəbul etdi. Oyunun afişası möhtəşəm idi: Ronaldo Levandovskiyə qarşı! Birinci 4 aydan sonra 40 yaşını tamamlayacaq, ikinci avqustda 36 yaşını qeyd edib, ancaq hələ də bu iki futbolçu yığmalarının ən parlaq sımalarıdı. Hərçənd yeni simalarla da tanış olmağın vaxtıdı. Məsələn, Portuqaliyanın heyətində yaxınlarda “Çelsi”də qol hesabını açan Veyqa debüt etdi. Amma Portuqaliyanın qələbəsini ənənəvi qəhrəmanlar təmin etdi. Ağıllı Bruno Fernandeş turnirdəki üç oyunun hər birində məhsuldar hərəkətlə yadda qalıb. MY-nin ulduzu bu dəfə başla Bernardo Silvaya məhsuldar ötürmə verdi. Yeri gəlmişkən, məhz Bernardo Millətlər Liqasında 20 oyun həddinə çatan ilk portuqaliyalı futbolçu oldu. Oyunun əvvəlində topu tirə vuran Ronaldo isə 37-ci dəqiqədə fərqi artırdı. Frankovski ilə Valyukeviçin zonasından yaxşı keçid edən Leaonun zərbəsindən sonra top dirəkdən döndü, Kriştiano təkrar zərbə ilə topu tora göndərdi.

Fasilədən sonra qonaqlar dəfələrlə fərqi darmadağın həddinə çatdıra bilərdi. Təkcə elə Fernandeş üç gözəl imkanı qaçırdı. 78-ci dəqiqədə Zyelinski intriqanı bərpa etdi. Final fitinə az qalmış isə meydanda kiçik qalmaqal yaşandı – Gözüböyük Ameyava qarşı kobud oynayan Semedunun hərəkətinə görə penalti təyin etmədi, qonaqların cavab hücumunda isə Mendeşin Jotaya ötürməsinin qarşısını almaq istəyən Bednarek topu öz qapısına göndərdi. Portuqaliya Millətlər Liqasında itkisiz irəliləyirsə, Polşa Xorvatiyanın ardından daha bir favoritə uduzdu. Sırf Ronaldo – Levandovski duelinə gəlincə, meydanda bir saatdan artıq olan portuqaliyalı komandasının qələbəsi üçün əlindən gələni etdi. Amma “Barselona”nın mərkəz hucmçusuna praktiki cəhətdən top çatmadı.

A liqası, 1-ci qrup
3-cü tur
Xorvatiya – Şotlandiya 2:1 (1:1)
Xorvatiya: Livakoviç, Qvardiol, Çaleta-Sar, Şutalo, Sosa, Paşaliç (P.Suçiç, 46), Modriç, Perişiç (Yakiç, 90+1), Kramariç (Budimir, 71), Matanoviç (Petkoviç, 71), L.Suçiç (Baturina, 62).
Şotlandiya: Qordon, Robertson, Henli, Suttar, Ralston, Maklin, Gilmor, Kristi, Maktominey, Doak (Adams, 77), Dayks (Qold, 77).
Qollar: Kristi, 33 (0:1). Matanoviç, 36 (1:1). Kramariç, 70 (2:1).
Vərəqə: Henli, 8. Paşaliç, 19. Perişiç, 39. Gilmor, 90+4 – sarı.
Hakim: İştvan Kovaç (Rumıniya).
12 oktyabr. Zaqreb. 21702 tamaşaçı.

Polşa – Portuqaliya 1:3 (0:2)
Polşa: Skorupski, Valyukeviç (Kivyor, 46), Bednarek, Davidoviç, Frankovski, Şimanski (Pyontek, 84), Oyedele, Zyelinski, Zalevski (Ameyav, 76), Sviderski (Urbanski, 76), Levandovski.
Portuqaliya: D.Koşta, Dalot, Diaş, Veyqa, Mendeş, Neveş, Fernandeş (Otavio, 90+1), B.Silva (S.Koşta, 90+1), Neto (Semedu, 81), K.Ronaldo (Jota, 63), Leao (Trinkan, 63).
Qollar: B.Silva, 26 (0:1). K.Ronaldo, 37 (0:2). Zyelinski, 78 (1:2). Bednarek, 88-öz qapısına (1:3).
Vərəqələr: Neto, 32. Valyukeviç, 45. Frankovski, 51. Pyontek, 88. Skorupski, 88 – sarı.
Hakim: Sərdar Gözüböyük (Niderland).
12 oktyabr. Varşava. 56954 tamaşaçı.

1. Portuqaliya 3 3 0 0 7-3 9
2. Xorvatiya 3 2 0 1 4-3 6
3. Polşa 3 1 0 2 4-6 3
4. Şotlandiya 3 0 0 3 4-7 0

Növbəti oyunlar oktyabrın 15-də keçiriləcək: Polşa – Xorvatiya, Şotlandiya – Portuqaliya.

Faktlar
* Ronaldo 39 yaşında yığmada 5 qol vurub. Heç bir başqa futbolçu belə nəticə ilə öyünə bilməz.
* Kriştiano həmçinin tarixə milli formada rəsmi oyunlarda 100-cü qələbəni qazanan ilk futbolçu kimi düşdü. Üstəlik o, yoldaşlıq oyunları da nəzərə alınmaqla Serxio Ramosun qələbə sayındakı rekordunu (131) təkrarladı.

Oyundan sonra
Robert Levandovski, Polşa yığmasının hücumçusu: