“Bəli, təəssüf ki, millilərimiz beynəlxalq turnirlərdə əcnəbi futbolçularla bacarmır. Serbiya, Xorvatiya, İslandiya, İngiltərə, Fransa və qardaş Türkiyə kimi ölkələr uzun müddətdi akademiyaları əhatə edən böyük layihələr reallaşdırır, bu yöndə ciddi addımlar atırlar. Bizdə isə kasadlıq var. Bu mənada Yaşar müəllimin fikirləriylə razıyam. Ölkəmizdə stadionların əksəriyyəti keyfiyyətsizdi, bazaların sayı azdı. Əlbəttə, bu, milli üçün futbolçu seçimlərinə ciddi təsir göstərir. Nəinki aşağı yaş komandalarında, əvəzedici kollektivlərdə belə ciddi problemlər var. Məhz U-17 liqasına gəlincə, burda “Neftçi”, “Sabah”, “Qarabağ”, “Zirə”, “Sumqayıt” kimi klubların komandaları arasında ciddi rəqabət var. Hamısı eyni səviyyədədi. Amma başqalarının əksəriyyəti həqiqətən geri qalır. Bu, acı reallıqdı. Təsəvvür edin ki, çempionatda 24:0, 15:0, 10:0 kimi nəticələr qeydə alınır. Fiziki çatışmazlıqla bağlı fikirlərdə də haqq var. Bir çox hallarda U-17 komandasına gələn futbolçular ürəkaçan səviyyədə olmur. Həmin yaşdan sonra fitnes məşqləriylə nəyisə dəyişməyə çalışsaq da, həmişə bu istəyə çata bilmirik”.