“Adil Mahmudov bizə ayrılmaq istədiyini bildirdi, biz də onun qərarına hörmətlə yanaşdıq. Onun uşaq futbolu ilə bağlı işi vardı. Seçimi gənclərin futboluna yönəlik verdi. Düzdü, bizim üçün də qəfil oldu. Bu üzdən hələ ki baş məşqçi vəzifəsinə namizədimiz yoxdu. Hazırda bu yerə kimi gətirəcəyimiz bilinmir. Komandanı növbəti oyunlara müvəqqəti baş məşqçinin köməkçisi Aydın Qasımov hazırlayacaq. İdarə Heyəti olaraq yığışıb, ətraflı düşünəndən sonra seçim edəcəyik. Əsas hədəfimiz mübariz, rəqabətədavamlı komanda yaratmaqdı. “Dişli”, rəqiblərə mübarizə aparacaq “Difai” yaratmaq istəyirdik. İndiki heyətimiz də imkan verir ki, bunu bacaraq. Ötən mövsüm əsasən Region Liqasında bizimlə çempion olan futbolçuları komandaya çağırmışdıq. Yayda isə kollektivin çox üzvü dəyişdi, daha təcrübəli və peşəkar futbolçular cəlb etdik. Düzdü, 1 xalımız var və hazırda 9-cu yerdəyik. Amma çempionatın hələ 4 turu arxada qalıb. Hansısa nəticə barədə danışmaq tezdi. Birinci dövrənin sonunda daha ətraflı müzakirə etmək, fikir bildirmək məqsədəuyğun olar. Bu mövsüm çempionat çox dəyişib. Ötənilki ilə indiki arasında böyük fərq var. Səviyyə artıb. Hansısa pillə uğrunda mübarizə aparmırıq. Sadəcə, daha yaxşı komanda formalaşdırmaq istəyirik. Yəqin baş məşqçi seçimi edərkən bütün bu amillər nəzərə alınacaq”.