Yığmamızın futbolçusu Mahir Emreli Millətlər Liqasının 4-cü turunda Slovakiyaya 1:3 hesabı ilə məğlub olduqları oyundan sonra “Football-plus.az”ın da suallarını cavabladı.

- Hər iki sarı vərəqə haqlı idi?
- Öz azarkeşlərin qarşısında qələbə qazanmayanda emosional olursan. Xüsusilə də azarkeşlər bir gün əvvəl bizi həvəsləndirmişdi. Fikrimcə, ilk sarı vərəqədə qayda pozuntusuna yol verməmişdim. Mənə elə gəlir ki, bu oyunda hakim rəqibə üstünlük verirdi. Heç nəyi bəhanə etmək istəmirəm. Düşünürəm ki, bugünki məğlubiyyətin əsas səbəbi qırmızı vərəqədi. Buna görə də başımı aşağı salıb, dilxor olmayacam. Qarşıda oyunlar var. Ümid edirəm ki, qarşıdakı oyunlarda daha yaxşı nəticə üçün meydana çıxarıq.

- Oyundan sonra baş məşqçi nəsə dedi?
- Onsuz da uşaq deyilik və başa düşürük. Artıq peşəkar futbolçuyuq. Özümüz başa düşürük ki, səbəb nədi. Ötürmə səhv getdi deyə, əks-hücumdan narahat oldum və öz mövqeyimdən qaçıb, komandama kömək etmək istədim. Rəqib oyunçu da ağıllı davrandı və fol qazandı.

- Dörd oyun, dörd məğlubiyyət ilə bağlı nə deyə bilərsən?
- Bundan əvvəl, səhv etmirəmsə, 5 oyun 5 qələbəmiz olmuşdu. Əlbəttə, məğlubiyyət adama təsir edir. Estoniyada ilk, burda isə ikinci yarıda biz üstün idik. Belə oyunlarda məğlub olanda insana toxunur. Komandanı ağır vəziyyətdə qoydum. Xalqımızdan, rəhbərlikdən, baş məşqçidən üzr istəyirəm. Futboldu, belə hadisələr olur. Bilmirəm ki, üzr istəmək nə dərəcədə doğrudu... Futbolçuyuq və daha yaxşı olmaq üçün çalışacağıq.

- Son oyunlarda qələbə qazanmaq mümkündümü?
- Estoniya ilə oyunda əlimizdən gələni edəcəyik. Vəziyyəti düzəltmək də bizim əlimizdədi. Xüsusilə evdə oynayacayıq. Bu da hardasa üstünlük olacaq. Estoniya ilə matçda buraxdığımız səhvləri təhlil edəcəyik. Düşünürəm ki, qarşıdakı iki oyuna daha yaxşı hazırlaşacağıq.

ƏSƏD SEYİDOV