İspaniya nəhəngi ''Barselona''nın doğma ''Nou Kamp'' stadionunda inşaat və yenidənqurma işləri davam edir.

Məlum olduğu kimi ''Barsa'' bu üzdən artıq ikinci mövsümdü, ev oyunlarını Luis Kompanisin adını daşıyan Olimpiya stadionunda keçirir. Bu arada yeniləndikdən sonra tutumunun 99 mindən 110 minə çatacağı gözlənilən ''Nou Kamp''da davam edən işlərlə bağlı maraqlı xəbərlər gəlməkdədi.

Məsələn, bu günlərdə stadionu təmir edənlər, konkret desək Rumıniya və Albaniyadan olan işçilər arasında dava düşdüyü məlum olub. Tərəflər hətta bir-birilərinə əllərinin altındakı daş və dəmirlərlə hücum edib. 6 nəfərin yaralandığı bildirilir. ''El Konfidensial''ın xəbərinə görə həmin işçilərin hamısı işdən çıxarılıb. Bu, son 5 ayda baş verən 2-ci analoji hadisədi. Mayın 23-də də işçilər arasında ciddi münaqişə yaşanmışdı. Həmin vaxt iki nəfər yaralanmış və 4 nəfər həbs olunmuşdu.

Bu arada inşaat işlərini üzərinə götürən Türkiyənin ''Limak'' şirkəti haqda da diqqətçəkən xəbər yayılıb. ''Barselona''ya öz doğma stadionundan kənar düşdüyü gündən bu yana dəyən zərər artıq 100 milyon avronu ötüb. Ona görə də rəhbərlik işlərin mümkün qədər tez tamamlanmasını istəyir. İlkin versiyalara görə inşaat işləri 2024-cü ilin noyabrın 29-da tamamlanmalı idi. Amma işlərin bu tarixdə yekunlaşması mümkün görünmür. Ona görə də açılış tarixi gələn ilin fevralına, ən gec isə gələn ilin sentyabrına planlaşdırılır.

İspaniya mətbuatının iddiasına görə ''Limak'' şirkəti açılış tarixi kimi göstərilən gündən (29 noyabr) sonra gecikən hər günə görə ''Barselona''ya 1 milyon avro təzminat ödəmək məcburiyyətində qalacaq! Hər halda tərəflər arasındakı anlaşmada bu cür maddə var.

ƏLİ