Maddi problemlərdən heç cür qurtula bilməyən ''Barselona'' son qərarı ilə bir çoxlarını təəccübləndirib.

Belə ki, rəhbərliyin qərarı bundan sonra tarixi ''Nou Kamp'' stadionu cütlüklərin üzünə açılacaq. Klubdan verilən rəsmi məlumatda qeyd olunub ki, Avropanın ən böyük stadionunda artıq toy, ad günü məclisləri, eləcə də müxtəlif əyləncə tədbirləri keçirmək mümkün olacaq. Hətta tədbirlərin qiymətləri də açıqlanıb. Məsələn, stadionun ''Foundation Lounge'' qismində 25-50 qonağın iştirakı ilə keçiriləcək toy üçün 2000 funt sterlinq ödəmək kifayət edəcək.

Bu, təkliflər arasında ən ucuz variantdı. Qonaq sayından asılı olaraq başqa seçim imkanları da var. ''Grandstand Hall''da 300-1000 qonağın iştirakı ilə toy keçirmək istəyənlər 17 min dollar ödəməli olacaq. İspaniyada otel və digər şadlıq məkanları ilə müqayisədə daha normal qiymətləri olan ''Nou Kamp''da bir tədbir maksimum 6 saat davam edə biləcək. Yeni ailə qurmağa hazırlaşan cütlüklərə həm də ''Nou Kamp''ın ot örtüyündə şəkil çəkdirməyə icazə veriləcək.