Kataloniya nəhəngi ''Barselona''nın oktyabrın ortalarında ''Nou Kamp'' stadionunun və ona yaxın ərazilərin yenilənməsi ilə bağlı tender elan edəcəyi gözlənilir.

Bu xəbəri İspaniyanın ''El Economista'' nəşri yayıb. Xəbərdə qeyd olunub ki, ''Barsa'' əslində bu layihəni hələ 2 il öncə həyata keçirmək istəyirdi. Amma həm pandemiya, həm də klubun maliyyə durumunun qaydasında olmaması üzündən layihə gecikirdi. Bu məsələnin Türkiyə futboluna aidiyyatı isə ondan ibarətdi ki, tenderdə iştirak edən şirkətlərdən birinin Nihat Özdəmirə məxsus ''Limak Holdinq'' olacağı gözlənilir! ''Fənərbaxça''nın sabiq vitse-prezidenti və Türkiyə Futbol Federasiyasının sabiq prezidenti olan 72 yaşlı Özdəmir ''Limak Holdinq''in iki qurucusundan biridi. Ümumilikdə isə ''Espai Barsa'' adı verilən layihənin tenderində 6 şirkətin iştirak edəcəyi gözlənilir. ''Limak Holdinq''dən başqa Fransanın ''Vinci'', eləcə də İspaniyanın ''Acciona'', FCC, ''Ferrovial'' və ''Sacyr'' şirkətləri bu layihəni üzərinə götürməkdə maraqlıdı. ''Barselona'' üçün olduqca mühüm əhəmiyyət daşıyan layihənin 2023-ün yanvarında başlayıb 2026-nın yayında bitəcəyi proqnozlaşdırılır. Onun dəyərinin isə təxminən 900 milyon dollar olacağı gözlənilir. Yenidənqurma işlərindən sonra hazırda 99354 azarkeş tutumuna malik olan ''Nou Kamp'' 105053 azarkeş qəbul edə biləcək. Bundan başqa, stadionun üstünə 50 min kvadrat metrlik örtük vurulacaq.