“Qriqorçuk "Neftçi"yə təyinat alanda böyük əksəriyyət rəhbərliyin düzgün seçim etdiyini bildirdi. Bu qərarı alqışlayanlar komandanın tezliklə əvvəlki əzəmətini qaytaracağına inanırdı. Hətta "Qarabağ"a "əlcək atacağını”, ciddi rəqabət aparacağını iddia edənlər də oldu. Qriqorçukun da komandanı yeni mövsümə hazırlamaq üçün yetərincə vaxtı vardı. “Neftçi” ötən mövsümün yekunlarına görə avrokuboklardan kənardan qalmışdı və mütəxəssis mövsümlərarası fasilədə sakit şəkildə hazırlaşmaq imkanı qazanmışdı. Çempionatın startına kimi müəyyən transferlər də gerçəkləşdi. Əslində "ağ-qaralar"ın ukraynalıdan əvvəlki heyətini heç də indikindən zəif saymıram. Bütün bunlara baxmayaraq, premyer-liqanın arxada qalan dövrəsi tam fərqli mənzərəni ortaya çıxardı. "Neftçi" birinci dövrəni qələbəsiz başa vuran yeganə komandadı. 9 oyunda 5 heç-heçə, 4 məğlubiyyət, təbii ki, flaqman tarixinin ən biabırçı səhifələrindən biri kimi yadda qalacaq. Xüsusilə milli fasilə ərəfəsində "Kəpəz"ə məğlubiyyət, məncə, rüsvayçılıqdan başqa bir şey deyil. Onu da nəzərə alaq ki, həmin qarşılaşmaya kimi "Kəpəz" cəmi 2 qol vurmuşdu. Buna görə də Qriqorçukun istefaya göndərilməsi qaçılmaz və labüd idi.

Bütün bunlara baxmayaraq, Qriqorçuku o vaxt postunda saxlamaq olardı ki, komandanın oyununda gələcək adına bir ümid olaydı. Amma "Neftçi"nin bu baş məşqçinin rəhbərliyi altında meydanda nə etdiyi, hansı futbolu oynadığı böyük əksəriyyətə aydın deyildi. “Ağ-qaralar”ın çıxışı gələcək adına qətiyyən ümid vermirdi. O fikirlə razı deyiləm ki, "Neftçi"nin büdcəsi və futbolçularının səviyyəsi "Qəbələ"dəkindən çox üstün idi. Qriqorçukun dövründə "qırmızı-qaralar"a kifayət qədər maliyyə ayrılırdı, yaxşı şərait yaradılmışdı, səviyyəli legionerlər gəlmişdi. Sadəcə, bir önəmli amili qeyd edim ki, "Qəbələ"nin istər azarkeş ordusu, istər ordakı təzyiq "Neftçi" ilə müqayisəyə gəlməz. "Neftçi" Azərbaycan futbolunun flaqmanıdı, üzdə olan komandasıdı, böyük azarkeş kütləsinə malikdi. Yəni "Neftçi"yə sağdan-soldan, hər tərəfdən təzyiqlər var və həmişə nəticə, titul tələb olunur. "Neftçi" üçün 2, 3-cü yer uğur sayılır. "Neftçi"də çalışmaq həddən artıq çətindi.

"Qəbələ" "Neftçi" deyil, "Neftçi" də "Qəbələ". "Neftçi"də işləmək hər mütəxəssisin öhdəsindən gələ biləcəyi iş deyil. Qriqorçukun fəaliyyəti də sübut etdi ki, "Neftçi"də çalışmaq çox çətindi. Roman İosifoviçin ən böyük səhvlərindən, "Neftçi"dəki uğursuzluğunun səbəblərindən ən birincisi ailə mühitini yarada bilməməsidi. Daha konkret desəm, komandadaxili mühiti pozmasıdı. Qara Qarayevlə bağlı hadisə, komandanın şəksiz lideri Emin Mahmudovdan kapitan sarğısının alınması... Komandanı arxasınca aparan bir futbolçudan sarğını alırsansa və yay fasiləsində gələn Ramil Şeydayevə verirsənsə, ab-havanı pozmuş olursan. Eləcə də Qara Qarayevlə bağlı məsələ komandaya ciddi zərbə vurdu. Bunun nəticəsində məlum uğursuzluq qaçılmaz idi.

Qriqorçuk "Neftçi"də nəinki uğurlu ola, komandanı müəyyən bir səviyyəyə qaldıra bilmədi. Halbuki gələndə ondan çox şey gözlənilirdi. Amma gözləntilərin 20-30 faizi doğrultmadı. Bütün bunları nəzərə alaraq deyim ki, "Neftçi" rəhbərliyinin qərarı haqlıdı və yerində verilmiş qərardı. Çünki bütün baş məşqçilər nəticəyə birbaşa cavabdehdi. Nəticə də göz önündədi. Ona görə də Qriqorçukun yola salınması bütün bu proseslərin məntiqəuyğun yekunudu. Sonrası necə olacaq, "Neftçi"yə kim gələcək, komandanı bu çətin durumdan çıxarmağı bacaracaq, ya yox - bunu gələcəkdə görəcəyik”.