Millimiz Millətlər Liqasının 3-cü turu çərçivəsində səfərdə Estoniyaya məğlub olsu - 1:3.

"Football-plus.az" xəbər verir ki, matçdan sonra yığmamızın baş məşqçisi Fernando Santuş jurnalistlərin suallarını cavabladı.
- Oyuna yaxşı başladıq. 35-ci dəqiqəyə qədər kompakt oynadıq. Rəqibin şansları olmadı. Amma futbol belə oyundu. Onlar ilk qolu vurandan sonra özümüzü toparlayıb hesabı bərabərləşdirdik. İlk yarıya əlavə olunmuş dəqiqələrdə ikinci qolu buraxdıq. Rəqib də ağıllı komandadı. Əks-hücumda oynamağa başladılar. Şanslarımızı dəyərləndirə bilmədik. Topu qapıdan keçirə bilmirsənsə, rəqib bundan faydalanır...

- Yarımmüdafiənin mərkəzində iki futbolçu qalmışdı. Onlar sanki işin öhdəsindən gələ bilmirdi. Məğlubiyyətdə seçdiyiniz taktiki sxemin rolu oldu?
- 3-4-3 sistemi ilə oynayırdıq. Mərkəzdə 4 futbolçu var idi. İlk 35 dəqiqədə bizim oyunçular rəqibə oynamağa imkan yaratmırdı. Onlar əks-hücumda qol vurdular. Bizim buna qədər dörd şansımız oldu, amma istifadə edə bilmədik. Fikrimcə, birinci hissədə ən yaxşısını etdik. Taktiki sxemdə səhv olmayıb. Üç qol buraxdıq. Amma bir o qədər də qol vurmaq şanslarımız oldu. Normal vəziyyətdə bu oyunun ilk yarısı 2:0 hesabıyla bizim xeyrimizə olmalıydı.

- Əlinizdə olan futbolçuların səviyyəsinin yetərli olduğunu düşünürsünüz?
-Başa düşürəm, amma oyunçuların çox yaxşı şansları oldu. Bu, futboldu, belə şeylər olur. İsveçlə oyunda da çoxlu şanslardan yararlana bilmədik. Bizim problemimiz müdafiədədi. Üç oyunda 8 qol buraxmışıq. Vacib olan odu ki, işimizi davam etdirməliyik. 1-2 həftə ərzində problemləri həll etmək mümkün deyil. Nəsə əldə etmək üçün vaxt lazımdı.

- Hücum futbolu oynadırsız. Cəsarətlidi, amma bunun arxasında güc yoxdu. Bu taktika ilə davam edəcəksiz?
- Taktikanı dəyişməyi düşünmürəm. Hücum futbolu oynamağa üstünlük verirəm. Bir yol seçmişik. Hər dəfə dəyişmək olmur. Əlimdə olan futbolçularla bu sxemlə davam edəcəm. Yarımmüdafiə xəttində dörd oyunçu olacaq.

- Elvin Cəfərquliyev mükəmməl oyun keçirdi. Onun gələcəkdə hansısa yaxşı kluba keçməsinə töhfə verə, hansısa tanışınıza məsləhət görə bilərsiz?
- Elvin möhtəşəm hücum talantına malikdi. Amma müdafiə cəhətdən bir az çətinlikləri var. Üzərində işləməklə şanslarını artıra bilər. Həm hücum, həm də müdafiə xəttində eyni səviyyədə oynamaq çətindi.

- Niyə kapitan Abbas Hüseynov idi?
- Niyə olmasın ki? Düşünürəm ki, Abbas yaxşı kapitandı. Əsas kapitan Bədavi Hüseynovdu. Amma o Azərbaycan dilində danışa bilmir. Bu səbəbdən Abbasa üstünlük verdim.