“Qarabağ" Avropa Liqasında mövsümün ilk ev oyununu keçirirdi. Başlanğıc yaxşı oldu. Qolu tez vurduq. Axır ki Juninyonun ayağı açıldı. Oyunu Yunanıstandan olan hakimlər briqadası idarə edirdi. Oyunun axarı elə idi ki, cərimə meydançası daxilində mübahisəli məqam, qaranlıq epizod olmadı. Nəsə qərar verərkən diqqətsizlik etdiyini də görmədim. VAR-a təkcə "Qarabağ"ın ikinci qolunu yoxlamaq üçün baxıldı, onda da düz qərar verdi. Həqiqətən də Juninyo rəqibdən öndəydi, qol sayılmamalıydı. Ümumiyyətlə, baş hakim fiziki cəhətdən matça hazır idi. Zahiri görkəmində də elə bir nöqsan hiss olunmadı. Köməkçilərlə əlaqəsi normal görünürdü. Meydanda ən problemli məsələsi mövqe seçimi idi. Bir neçə dəfə oyunçular arasında hərəkət etməkdə çətinlik çəkirdi, topa çox yaxın idi. Çatışmayan tək cəhət kimi bunu demək olar. Yəqin ki, hakim-inspektor ona tövsiyə və məsləhətlərini verəcək. Oyun elə də kobud keçmədi. İki sarı vərəqə qaydalar çərçivəsində göstərildi. Oyun hakimlər üçün elə bir çətinlik yaratmadı. Ümumilikdə hakimlər briqadası işin öhdəsindən gəldi”.