''Bozqurd''u göstərən Merih Dəmirala heykəl qoyuldu!
Məlum olduğu kimi Türkiyə yığmasının son Avropa Çempionatındakı uğurlu macərası zamanı Merih Dəmiralın hərəkəti gündəmi zəbt etmişdi.
1/8 finalda Avstriya ilə oyunda iki qol vuran müdafiəçi qol sevinci zamanı ''bozqurd'' işarəsi göstərmişdi. UEFA isə bunun siyasi bir simvol olduğuna qərar verərək 26 yaşlı oyunçuya 2 oyunluq cəza vermişdi. Elə həmin günlərdə Bolunun bələdiyyə sədri Tanju Özcan şəhərin mərkəzində Merihin heykəlini ucaldacaqlarına söz vermişdi.
Dünən həmin heykəlin açılış mərasimi olub. Merihin bozqurd işarəsini göstərdiyi abidə Karaçayır Məhəlləsi adlanan ərazidə ucaldılıb. Heykəlin açılışında iştirak edən Tanju Özcan bunları deyib:
''Əvvəlcə Merihin özündən icazə aldıq. Sonra da verdiyimiz sözün üstündə durduq. Özü ilə söhbətdə bundan yalnız qürur duyacağını bildirdi. İspaniyalılar qol vurduqdan sonra dəfələrlə öz simvolları olan öküzü işarə ediblər. Amma buna görə onlara heç vaxt cəza verilməyib. Bozqurd da bizim simvolumuzdu. Bu hərəkətə görə futbolçuya cəza verilməməlidi. Başa düşmürəm, hökumət nə üçün bu məsələyə soyuq yanaşdı? Üstəlik bozqurd MHP-çilərin və ülkücülərin simvolu deyil. Bu, böyük bir yalandı. Heç bir partiya bunu özününküləşdirməyə çalışmasın. Bozqurd Orta Asiya Türk Cümhuriyyətində, Albaniya, Bolqarıstan, İran və Azərbaycan türklərində yüzlərlə il öncə istifadə olunan bir simvoldu''.
ƏLİ
Digər xəbərlər
