Türkiyə yığmasının və “Atalanta”nın müdafiəçisi Merih Dəmirala məxsus “E-spor” komandası Türkiyənin ilk FİFA FUT liqası olan “Be The Champion” adlanan turnirdə çempion olub.

“Team Demiral Esports” adlanan və kiberidman yarışlarında iştirak edən komanda 4 həftə davam edən gərgin yarışın sonunda kuboku başı üzərinə qaldırıb. Kiberdiman üzrə Türkiyənin ən güclü oyunçularının və komandalarının iştirak etdiyi turnirdə “Team Demiral Esports”la yanaşı, “Qalatasaray”, “Beşiktaş”, “Fənərbaxça”, “FUT E-Spor” kimi komandalar da mübarizə aparırdı. Mayın 28-də başlayan turnirə iyunun 26-da yekun vuruldu.

Yarımfinalda “İF Parla ESports”u 2:0 hesabıyla məğlub edən “Team Demiral Esports” finalda “Dənizbank WildCast”ın rəqibi oldu. Final seriyasında rəqibindən 3:1 hesabı ilə üstün olan Merihin komandası Türkiyənin ən güclüsü adını qazandı.

Çempionluğun rəsmiləşməsinin ardından “Team Demiral Esports”un üzvləri Merihin özü ilə onlayn əlaqə qurdular. Tanınmış futbolçu komandasını bu uğur münasibəti ilə təbrik etdi. Komandanın üzvləri daha sonra mətbuata verdikləri açıqlamada bu uğuru kollektivin yaradıcısı Merih Dəmirala həsr edərək çempionluğun davamının gələcəyini qeyd etdilər. Onu da bildirək ki, ötən ilin avqustunda qurulan “Team Demiral Esports” FİFA-dan başqa Valorant və “PUBG Mobile” oyunlarında da iddialıdı.