İspaniyanın qələbəsi ilə yekunlaşan AÇ-2024-də bağlı növbəti cəzalar açıqlanıb.

“Football-plus.az” xəbər verir ki, UEFA bu dəfə turnirin pley-off mərhələsi üçün cəzaları açıqlayıb. 1/8 finalda Avstriya səddini aşan, 1/4 finalda isə Niderlanda uduzaraq mübarizəni dayandıran qardaş Türkiyə yığmasının da cəzası bəlli olub. UEFA-nın qərarında qeyd olunub ki, Türkiyə idman müsabiqəsində uyğun olmayan bir mesajı təbliğ etməyə görə 20 min avro, tribunada petardalar yandırıldığına görə 3750 avro və meydana yad cisimlər atıldığına görə 20 min avro cəza alıb. Uyğun olmayan bir mesajın təbliğ edilməsi dedikdə Merih Dəmiralın hərəkəti nəzərdə tutulur. Bilindiyi kimi bu futbolçu Avstriya ilə oyunda vurduğu qoldan sonra ''Bozqurd'' işarəsi göstərdiyinə görə 2 oyunluq cəza almışdı. Bundan başqa Niderlandla oyunun son anlarında ehtiyat skamyada ola-ola qırmızı vərəqə alan gənc forvard Bertuğ Yıldırım Türkiyənin növbəti rəsmi oyununu buraxmalı olacaq.

Qeyd edək ki, UEFA qrup mərhələsindən sonra da cəzaları açıqlamışdı. Həmin vaxt Türkiyəyə 95125 avroluq cəza kəsilmişdi. Fransa, İspaniya və Slovakiyadan başqa bütün yığmalara pul cəzası verilmişdi. Türkiyə qrup mərhələsində Xorvatiya (220875 avro), Albaniya (171375 avro) və Serbiyanın (166625 avro) ardından qrup mərhələsində ən çox pul cəzası alan 4-cü komanda olmuşdu.

ƏLİ