Embiid 193 milyon dollar qazanacaq
“Filadelfiya 76”nın mərkəz oyunçusu Coel Embiid klubla müqavilə müddətini uzadacaq.
Bu haqda xəbəri “The Athletic” yayıb.
Bu qaynağın iddiasına görə, “Siksers” 30 yaşlı amerikalıyla müqavilə müddətini 2029-cu ilə qədər uzatmağı razılaşdırıb. Ulduz basketbolçu yeni müqavilə üzrə 193 milyon dollar qazanacaq.
Embiid yeni müqaviləyə imza atandan sonra MBA-da ümumi qazanc məbləğinə görə ilk “10-luğ”a düşəcək. Hazırda bu özünəməxsus reytinq sıralamasına “Leykers”in forvardı Lebron Ceyms (479 milyon dollar) başçılıq edir. Lebrondan söz düşmüşkən, dünya ulduzu oğlu Bronni ilə birgə qatıldığı ilk məşqlərlə bağlı təəssüratını bölüşüb:
“Bu həftə ilk dəfə meydanda peşəkarlar kimi məşq etdik, yeni mövsümə hazırlaşmaqdayıq. Tez-tez konsentrasiyanı itirirdim, hərçənd bu mənə xas olan keyfiyyət deyil. Ancaq bəzən, sadəcə, dayanır və Bronninin necə məşq etməsinə, hədəfə çatmağa çalışmasına baxırdım. Bu il həm mənim, həm də ümid edirəm ki, onun üçün qeyri-adi il olacaq”.
Oktyabrda 20 yaşını tamamlayacaq Bronni ötən mövsüm Cənubi Kaliforniya Universitetinin heyətində tələbə liqasında çıxış edib.
Dekabrda 40 yaşını tamamlayacaq Lebron isə MBA-da 22-ci mövsümünü keçirməyə hazırlaşır. Böyük Ceyms MBA-da keçirdiyi 1492 oyunda orta hesabla 27,1 xal toplayıb, 7,5 ribaund edib və 7,4 məhsuldar ötürmə verib.
Digər xəbərlər
