''Qalatasaray''ın Joze Mourinyolu ''Fənərbaxça''nı səfərdə məğlub etməsi sosial şəbəkələrdə geniş müzakirələrə səbəb oldu.

''Qalatasaray'' bu tarixi qələbədən sonra sosial şəbəkələrdə həm əzəli rəqibinə, həm də Mourinyoya sataşmaq fürsətini əldən vermədi. ''Cim-Bom''un ən maraq doğuran paylaşımı portuqaliyalı mütəxəssisin ləqəbi ilə bağlı oldu.

Bilindiyi kimi Mourinyo futbol dünyasında ''xüsusi biri'' kimi tərcümə olunan ''special one'' ləqəbi ilə tanınır. ''Sarı-qırmızılar'' oyundan sonra ''ağlayan biri'' kimi tərcümə olunan ''crying one'' kitabının Kadıköydə satışa çıxarılmasına aid məzəli bir paylaşım etdilər. Bu arada matçın ardından Mourinyo ilə türkiyəli bir müxbir arasında yaşanan dialoq gündəmi zəbt etdi.

Bilindiyi kimi portuqaliyalı mətbuat konfransına qatılmayaraq yalnız miks zonada qısa açıqlama vermişdi. Stadiondan ayrılan zaman isə bir müxbir ''one question'' (bir sualım var) deyərək ünlü məşqçini yanına çağırdı. Müxbir ''Qalatasaray''ın ''crying one'' paylaşımı barədə sual verərkən Mourinyo ondan ''sən kimsən'' deyə soruşdu. Müxbir ona ''Bəyaz TV''nin əməkdaşı olduğunu bildirdi.

Bundan sonra sualı dinləməyə qərar verən Mourinyo uzun müddət təəccüblü sifəti ilə müxbirə baxdı. Məlum oldu ki, müxbir fikrini ingilis dilində düzgün izah edə bilmir! O daha sonra ''Qalatasaray''ın paylaşımını telefonda Mourinyoya göstərmək istəyərkən məşqçi ona ''sən ciddisən, yoxsa zarafat edirsən'' sualını verdi. Mourinyo daha sonra ''I don't know turkish'' (türkcə anlamıram) deyərək ordan uzaqlaşdı.

ƏLİ