Gəncə şəhər stadionunun durumundan narazı valideynlər dilə gəldi
Bilindiyi kimi, AFFA-nın aşağı yaş qrupları üzrə çempionat matçları Gəncə şəhər stadionunun ehtiyat meydançalarında keçirilir.
Redaksiyamıza məhz həmin oyunlarla bağlı müraciət daxil olub. Belə ki, övladları Gəncə təmsilçisilərindən "Azəri" klubunun akademiyasında olan bəzi valideynlər matçların baş tutduğu yerdən narazıdı. Onlardan Ərkin Ramazanov, Mircəlal Məmmədov, Anar Nəcəfov, Samir Həsənov, Lətifə İsmayılova, İslam Əkbərov və Ceyhun Qurbanov stadionun yenidən inşasıyla bağlı ortaya çıxan mənzərəyə görə məyusdu. Valideynlərin iddiasına görə, həftəsonu keçirilən oyunlar üçün istənilən şərait yoxdu.
Sizi şikayətçilərin müraciəti ilə tanış edirik:
"Əvvəla paltardəyişmə otaqlarının durumu ürəkaçan səviyyədə deyil. Hamamlarda da lazımi şərait yoxdu. Tikinti prosesiylə bağlı ağır tonnajlı yük maşınlarının hərəkəti, bu və başqa səbəblərdən havanın çirkinliyi azyaşlı uşaqlar üçün problemə çevrilib. Bu üzdən AFFA-dan oyunların Gəncədə yox, Göyçayda yerləşən Olimpiya İdman Kompleksində keçirilməsini xahiş edirik. Həmin idman qurğusunun mövcud şəraitiylə tanışıq. Oyunlar orda keçirilsə, azyaşlı övladlarımızın sağlamlıq durumundan daha arxayın olacağıq".
"Futbol+" olaraq, valideynlərin müraciəti haqda AFFA-nı məlumatlandırmağı və təklif haqda mövqeyini öyrənməyi lazım bildik. Bu məqsədlə qurumun Mətbuat və İctimaiyyətlə Əlaqələr Departamentinin rəhbəri Elnur Məmmədli ilə əlaqə saxladıq. O, "football-plus.az"a açıqlamasında bunları dedi:
"Məsələdən xəbərdarıq. Komandaların, demək olar ki, əksəriyyəti Gəncəni təmsil edir. Bu səbəbdən oyunların Göygöldə keçirilməsinin müəyyən çətinlik yaratmaq ehtimalı böyükdü. Uşaqların azyaşlı olması hər dəfə Gəncədən Göygölə gedib-gələrkən əlavə problemlərə səbəb ola bilər. Həm də Göygöl Olimpiya Kompleksinin süni ot örtüyü elə də yaxşı vəziyyətdə deyil. Qış aylarında orada küləkli və soyuq hava şəraiti hökm sürür. Gəncə şəhər stadionundakı paltardəyişmə otaqlarının durumundan xəbərdarıq. Bu istiqamətdə müəyyən işlərin görülməsi nəzərdə tutulub ki, uşaqlar daha yaxşı şəraitdə oyuna çıxa bilsin".
KƏNAN BAHADIR
Digər xəbərlər
