“Sumqayıt” Misli premyer-liqasının 4-cü turu çərçivəsində səfərdə “Sabah”a məğlub oldu - 1:3.

“Football-plus.az” xəbər verir ki, “kimyaçılar”ın baş məşqçisi Samir Abasov oyundan sonra keçirilən mətbuat konfransında iştirak edib və jurnalistlərin suallarını cavablandırıb:
“Oyun haqda yox, ümumiyyətlə vəziyyət haqda danışmaq istəyirəm. Futbolçularda yorğunçuluq var. Həm psixoloji, həm də fiziki cəhətdən belədi. Bəli, 1-2 oyunçu var ki, toplanış keçməyiblər. Bu da oyunda öz təsirini göstərir. Avrokuboklardan gəlmişik. Bir oyunumuz qalıb, daha sonra milli fasiləsi olacaq. Yaxşı dincəlib, bundan sonra yaxşı oynamalıyıq. Futbolçularla da danışıram, onlar yorğunçuluğu önə çəkir. Çempionatın əvvəlidi. Sabah necə olacağını bilmirik. Deməzdim ki, bu gün göstərdiyimiz oyuna görə futbolçulardan tam razıyam. Oyun haqda danışmaq istəmirəm. Artıq bu matç geridə qaldı. Növbəti görüş haqda düşünməliyik. “Araz-Naxçıvan”la evdəki oyun bundan da çətin olacaq. Avrokuboklarda uduzaraq iştirakını dayandıran ilk komanda biz olduq. Bunun altından çıxa bilməmişik. Futbolçularda onun üzüntüsü, məsuliyyəti var. Bu vaxta qədər top saxlayan komanda kimi seçilirdiksə, bu gün çox top itirdik. Futbolçulara da dedim ki, top itirməsək, öz oyunumuzu oynasaq qollar vura bilərik. Toplar itiririk. Bunu təkcə yeni gələnlərə şamil etmirəm. Futbolçu yorğunluq hiss edirsə, oyununa təsir edir. Onları başa düşməyə çalışırıq".

- Hesabda öndə oldunuz, ancaq üstünlüyü qoruya bilmədiniz. Nə çatmadı?

- Yorğunçuluğa görə hesabdakı üstünlüyü qoruyub-saxlaya bilmədik. “Sabah” evdə oynayırdı, birəbir güclü oyunçuları var. Tapşırığımız o idi ki, rəqibin cinah oyunçularını tək qoymayaq. Dayaq yarımmüdafiəçiləri onlara kömək etməli idi. Fernando Madeyros çatdırmırdı və yük digərlərinə düşürdü. “Sabah”ın oyununda görünürdü ki, boşluqlar verirdik, qol vura bilərlər.

- Yeni transfer Alan Diası sifariş ərizəsinə nə vaxt daxil edəcəksiz?

- Alanı indi sifariş etmək fikrimiz yoxdu. Onun vəziyyətini bilirik. Bir-iki ay hazır olacaq. Bunu bilirdik. Digər transferimiz, hücumçunun işi ilə məşğul olurduq və bu gün 13:00-a qədər gözləyirdik. Amma nə Özbəkistan Futbol Federasiyasından, nə də AFFA-dan asılı olan məsələ deyil. Sistem olaraq FİFA-dan nəsə yaşandı, ona görə alınmadı. İnanırıq ki, yaxın günlərdə onu da iştirak ərizəsinə daxil edəcəyik.

- Bilirik ki, mövsümlərarası fasilədə “Neftçi”dən sizə təklif gəlmişdi. Bu gün “Sumqayıt”ın sükanı arxasında qaldığınıza görə peşman deyilsiz?

- Əsla. Ən azından öz şəhərimin komandasıdı, öz şəhərimin komandasının baş məşqçisiyəm.