“Nyuberq Zaqrebdəki oyunu yüksək səviyyədə idarə etdi. Onun idarəçiliyindən razı qaldım. Düzdü, "Qarabağ"ın ləğv edilən qolunda müəyyən şübhələr yaranmışdı.

Oyundankənar vəziyyət qeydə aldılar, çünki Juninyonun zərbəsi "Dinamo"nun oyunçusu Teofil-Ketrinin üzünə toxundu. Bu halda da yan xətt hakimi doğru olaraq bayrağı qaldırdı.  Son təlimatlara, UEFA-nın builki qərarına görə həmin epizod ofsayd sayılmalıydı. 56-cı dəqiqədə Romaonun çiynindən tutub saxlayan Suşiçə sarı vərəqə göstərdi, cərimə zərbəsi təyin etdi. 62-ci dəqiqədə Romao artıq neçənci dəfə idi kobud oynayırdı. Hakim isə hücum bitəndən sonra onun üçün sarı vərəqə çıxardı. Bir qədər sonra Medinaya qarşı kobud davranış zamanı rəqib oyunçu Kulendoviçə də “sarı” göstərdi. 

Yəni vərəqələrə baxanda da ədalətli və yerində verilmiş qərarlar olduğunu görürük. Ümumilikdə çalışdı ki, bitərəf mövqe tutsun. Oyunun tempini aşağı salmırdı, hücumu kəsmirdi, qayda pozuntusunda da nizam-intizamlı davranırdı. Hakimliklə bağlı heç bir mübahisə ola bilməz. İsveçli oyunu çox yüksək səviyyədə idarə etdi”.