Bu gün Misli premyer-liqasında 4-cü tura start veriləcək.

"Səbail"in "Kəpəz"i qəbul edəcəyi açılış oyununu "CBC Sport" yayınlayacaq.

Misli premyer-liqası
1-ci dövrə, 4-cü tur
23 avqust
Səbail - Kəpəz 4:0
Fərid Nəbiyev, 12. Sofir Gitay, 34. Ayman Bouali, 49. Süleyman Alluş, 54.
"Səbail"in bu rəqiblə ev oyunlarının balansı: 6:+3=3-0, 10:5.
2017/18 - 1:0, 1:1; 2022/23 - 4:1, 1:0; 2023/24 - 0:0, 3:3.
Cəzalı: yoxdu.
"Futbol+"in proqnozu: 40-30-30.
Bakı, "ASCO Arena". Saat 19.00.

Bayılda "Səbail" "Kəpəz"lə qarşılaşacaq. Hər iki komandanın heyətində xeyli çatışmazlıq hiss olunur. Əlbəttə, rəqiblə müqayisədə "dənizçilər" daha şanslı görünür. Onları yalnız meydan sahibi olduğuna görə yox, həm də ilk üç turda göstərdiyi oyuna əsasən favorit saymaq olar. Şahin Diniyevin komandasının nəticələri ürəkaçan olmasa da, əzmkar çıxışı gələcək üçün ümid vəd edir. Komandanın müdafiə xəttində görünən boşluqlar hücumların bəhrəsini azaldırsa, bunu yalnız daha çox məşq etməklə aradan qaldırmaq olar. Çünki "Səbail"in "yay bazarlığı" böyük ehtimalla başa çatıb. İndi "dənizçilər" mövsümün ilk qələbəsini qazanmaqla azarkeşlərini sevindirməlidi.

Rəqibin qorxunc durumundan faydalanmaq olar. Axı ilk üç oyunda məğlub olan "Kəpəz" heç qol da vurmayıb! Adil Şükürovun təzyiqlərə sinə gərmək və komandanın ruhdan düşməsinə mane olmaq niyyəti ilə verdiyi vədlər isə hələ reallaşmayıb. "Sarı-göylər" oyun planındakı ciddi çatışmazlıqlarla diqqəti çəkir. Turdan-tura daha da "sınan" kollektiv təcili toparlanmalıdı. Yoxsa tezliklə fərqli problemlər baş qaldıracaq. Gəncəli azarkeşlərin tələbkarlığını və təzyiqini də nəzərə alsaq, hadisələrin axarını indidən təxmin etmək mümkündü. Odu ki, "qatar relsdən çıxmadan" tədbir görülməli və premyer-liqada qalmaq hədəfinə zəmin yaradılmalıdı. Prosesin "Səbail"lə oyunda başlayıb-başlamayacağını demək çətindi. Lakin "dənizçilər"in "Kəpəz"lə son ev oyunlarında heç-heçəyə meyilliliyi qonaqların azı 1 xal üçün ümidlərini artırır. O başqa məsələ ki, "sarı-göylər" hələ "dənizçilər"i səfərdə məğlub etməyib.

Ümumiyyətlə, bu komandalar indiyə qədər 12 dəfə üz-üzə gəlib. Bunların 6-da Bayıl, 3-də Gəncə təmsilçisi qələbə qazanıb, 3-də isə "sülh" qeydə alınıb. Topların nisbətində "Səbail" öndədi - 21:14.

KƏNAN BAHADIR