''Qalatasaray''ın ''Yanq Boyz''a 2:3 hesabı ilə məğlub olduğu qarşılaşmada bir məqam diqqəti cəlb etdi.

İstanbul nəhənginin kapitanı Fernando Muslera ilk yarının sonlarında zədələndiyi üçün fasilədə əvəzləndi. İkinci hissədə qapını Günay Güvənc qorudu. Muslera oyundan çıxdıqdan sonra kapitanlıq sarğısı Mauro İkardiyə verildi. Halbuki ötən mövsüm ikinci kapitan statusunda Kərəm Aktürkoğlu idi. İkardi isə yalnız üçüncü kapitan idi. Maraqlıdı ki, oyunun son anlarında İkardi əvəzləndikdən sonra sarğı yenə Kərəmə verilmədi. Bu dəfə sarğını Berkan Kutlu taxdı.

Bu olay fanatlar arasında müzakirələrə səbəb oldu. Belə çıxır ki, Kərəm artıq komandanın kapitanlarından deyil. Belə güman olunur ki, superkubokda ''Beşiktaş''la oyunun fasiləsində yaşanan qalmaqaldan sonra Aktürkoğlu kapitan statusunu itirib. Türkiyə mətbuatı iddia etmişdi ki, həmin matçın fasiləsində Kərəm əvəzləndiyini öyrəndikdən sonra yüksək səslə nalayiq ifadələr işlətmiş və onunla baş məşqçi Okan Buruk arasında münaqişə yaşanmışdı.

Bu mövsümün kapitan ardıcıllığına dair klubdan indiyə qədər rəsmi bir açıqlama verilməyib. Amma Kərəm meydanda ola-ola sarğını taxmaması belə düşünməyə əsas verir ki, o artıq ''Qalatasaray''ın kapitanlarından deyil.

ƏLİ