Bilindiyi kimi, “Qarabağ” ev oyununda məğlub olduğu “Ludoqorets”i səfərdə məğlub edərək Çempionlar Liqasının pley-off mərhələsinə yüksəldi.

Ağdamlılar ÇL-in əsas mərhələsinə düşmək üçün Zaqreb “Dinamo”sunu mübarizədən kənarlaşdırmalı olacaq. Bunun isə heç də asan olmayacağı bəllidi. Müxtəlif məqamlara baxanda Xorvatiya təmsilçisinin aşkar üstünlüyü var. Əlbəttə, “Qarabağ” bu mənada futbol ictimaiyyətini təəccübləndirməyi bacarıb. Ötən mövsüm “Braqa”nı necə mübarizədən kənarlaşdırdıqlarını, “Bayer-04”lə başabaş mübarizəni unutmamışıq.

“Transfermarkt” portalının məlumatına görə zaqreblilərin büdcəsi 72, “Qarabağ”ın büdcəsi isə 16 milyon avro təşkil edir. Bundan başqa, “Dinamo”nun avrokuboklar təcrübəsi daha zəngindi. Avrokuboklarda 380 oyuna çıxan “mavilər” 155 qələbə, 82 bərabərlik və 143 məğlubiyyətlə yadda qalıb. 180 matç keçirən təmsilçimiz 69 qələbə, 46 heç-heçə və 65 məğlubiyyətlə yadda qalıb. “Dinamo”nun heyəti əsasən yerli oyunçulardan ibarətdi. Bunlar arasında sonuncu Avropa çempionatında iştirak edən Martin Baturina və Bruno Petkoviç kimi tanınmış simalar da var. “Qarabağ” kimi “Dinamo” da ölkəsinin hegemonudu. Zaqreblilər 2006-cı ildən bəri yalnız bir dəfə - 2016/17 mövsümündə çempion ola bilməyib.

Faktlar hər nə qədər “Dinamo”nun tərəfində olsa da, “Qarabağ”a və Qurban Qurbanova inanmağa dəyər. Onlar artıq Azərbaycanı möcüzələrə öyrəşdirib!

KAMAL SƏFƏR