Bu gün “Qarabağ” Çempionlar Liqasının pley-off mərhələsində ilk oyununu keçirəcək. Zaqrebdə keçiriləcək matçda rəqib “Dinamo”du.

Ağdam təmsilçisinin avrokubok həyəcanını bu dəfə də “CBC Sport”la yaşayacağıq.

Çempionlar Liqası
pley-off, ilk oyun
Dinamo (Xorvatiya) – Qarabağ 3:0
Marko Pyasa, 30. Sandro Kulenoviç, 75; 80.
Hakimlər: QLENN NYUBERQ, Mahbod Beiqi, Andreas Söderkvist, Adam Ladebak (hamısı İsveç).
20 avqust. Zaqreb, “Maksimir” stadionu. Saat 23.00.

“Qarabağ” növbəti tarixi uğurun astanasındadı. “Köhlən atlar” tarixində 2-ci dəfə qrup, UEFA-nın format dəyişikliyinə əsaslansaq, liqa mrəhələsinə vəsiqə qazanmaq niyyətindədi. Qurban Qurbanovun komandası ilk dəfə 2017/18 mövsümündə bunu bacarıb ki, həmin vaxt “Çelsi”, “Roma” və “Atletiko” ilə mübarizə aparıb. Kollektiv “Atletiko” ilə hər iki oyunda heç-heçə edib (0:0, 1:1), digər dörd matçda isə uduzub və qrupu 2 xalla sonuncu yerdə tamamlayıb. Əlbəttə, bu dəfə hədəf daha yüksəkdi. Lakin hələ “Dinamo” maneəsiylə üz-üzəyik.

“Qarabağ”ın həm səfər, həm də ev matçında xorvatlara qarşı layiqincə mübarizə aparacaqlarına inananlar az deyil. Ona görə ki, “köhlən atlar” ötən mövsüm Avropa Liqasında qazandığı nəticələrlə nəinki ölkəmizə, dünyaya səs salıb. İndi çoxu “Dinamo”ya diqqətli olmağı və rəqibə qarşı ciddi hazırlaşmağı məsləhət görür. Hazırlaşmaq demişkən, ağdamlılar ilk görüşə tam heyətlə hazır deyil. Şahruddin Məhəmmədəliyev, Musa Qurbanlı, Marko Yankoviç və Marko Veşoviç zədəlidi. Bəli, “Şah”la Musanın yoxluğunun prinsipial çətinlik yaratmır. Yankoviçin yerinə Patrik Andradeni, Veşoviçin əvəzinə isə Mateus Silvanı meydanda görə bilərik. Üstəlik yeni transfer Mateuş Koxalskinin adı da iştirak ərizəsinə salınıb. Bəlkə də narahat olmağa dəyməz. Çünki “Qarabağ” yeni mövsümdə keçirdiyi dörd avrokubok, iki çempionat oyununda yaxşı təsir bağışlayıb.

“Dinamo”ya gəlincə, meydan sahibi statusu, azarkeş dəstəyi, çempionatının səviyyəsi və avrokubok təcrübəsi sayəsində daha şanslı görünür. Düzdü, “köhlən atlar” dəfələrlə belə duellərdən qalib ayrılıb. Lakin rəqibin cütün favoriti olduğu bəllidi. Zaqreb təmsilçisi yeni mövsümdə, sadəcə, premyer-liqada üç matç keçirib. Odu ki, ölkə reytinqi hesabına birbaşa pley-offda “əyləşən” komandaya kreslosunu dar etmək lazımdı. “Dinamo” təcrübəli futbolçulardan qurulan kollektivdi. Bu sırada xüsusilə Daniel Zaqorats, Ariyan Ademi, Stefan Ristovski, Yosip Mişiç və Kevin Teofil-Katrin kimi oyunçulardan bəhs etmək olar. Bununla yanaşı, komanda yeni simalarla güclənibsə, Bruno Petkoviç başda olmaqla bir neçə aparıcı futbolçusuyla müqavilələri yeniləyib. Həmçinin “Qarabağ” Misli premyer-liqasının 3-cü tur matçını təxirə salsa da, “Dinamo” Xorvatiya çempionatının 3-cü turunda meydana çıxıb və əsas rəqibi “Şibenik”i evdə darmadağın etməklə liderliyini qoruyub – 3:0. Bəli, “köhlən atlar” tarixinin növbəti çətin səfər sınağıyla üz-üzədi.

Uğurlar, “Qarabağ”!

KƏNAN BAHADIR