“Leykers” daha bir nömrəni istifadədən çıxardı

MBA klublarından “Leykers” X sosial şəbəkəsindəki səhifəsində Maykl Kuperin oyun nömrəsini istifadədən çıxardığını elan edib.

Hücumameyilli müdafiəçi Los-Anceles klubunun heyətində 1978-90 aralığında 21 nömrəli forma ilə çıxış edib, həmçinin 1994-96 aralığında baş məşqçinin yardımçısı olub. “Gölməçəsevərlər”lə 5 dəfə MBA çempionu olan sabiq basketbolçu bu il 68 yaşını tamamlayacaq. 21 nömrəli formanın arenanın tavanına qaldırılması mərasimi gələn il yanvarın 13-də keçiriləcək.

“Leykers” əvvəllər 8 (Kobe Brayant), 13 (Uilt Çemberlen), 16 (Pau Qazol), 22 (Elcin Beylor), 25 (Qeyl Qudriç), 32 (Mecik Conson), 33 (Kərim Abdul-Cabbar), 34 (Şakil О'Nil), 42 (Ceyms Uorti), 44 (Cerri Uest), 52 (Camaal Uilks) və 99 (Corc Maykan) nömrəli formaları da istifadədən çıxarıb.