"Sabah" sabah Konfrans Liqasının 3-cü təsnifat mərhələsinin cavab oyununda "Sent Patriks"i qəbul edəcək.

"Football-plus.az" xəbər verir ki, "bayquşlar"ın baş məşqçisi Krunoslav Renduliç oyunöncəsi mətbuat konfransında jurnalistlərin suallarını cavablandırıb. Sizi mütəxəssisin fikirləriylə tanış edirik.

- Hər kəsi salamlayıram. Birinci oyunda uduzmuşuq. Sabah bizim üçün ağır oyun olacaq. Amma komandaların şansı bərabərdi. Hazırıq. Fürsətlərdən istifadə etməyə çalışacağıq. Bəzi əskiklərimiz də var. İvan Lepinitsa cəzalıdı. Onun yerini doldurmaq üçün həll yolu tapmalıyıq.

- "Sabah" səfərdə gözləniləndən zəif təsir bağışladı. Renduliç cavab matçında hansı oyun modelindən istifadə edəcək? Və strategiyasından nə dərəcədə əmindi?
- Müəyyən fikirlərinizlə razıyam. Səfərdə istədiyimiz oyunu sərgiləmədik. Qırmızı vərəqədən sonra möhtəşəm oyun göstərə bilməzdik. İlk 20 dəqiqədə qarşılaşmaya nərazərət etmişdik. Yenə matçı idarə etməyə çalışacağıq.

- Müdafiə xəttində boşluqlar çoxdu. Bu problemi necə həll etmək istəyirsiz?
- Cavab çox sadədi. Hər kəs müdafiə olunmağı bacarmalıdı. Lazım gəlsə, hücumçular da arxada oynayanlara kömək etməlidi.

- "Makkabi"ylə cavab matçından sonra komandanın çıxışı qaneedici deyil. Bu nəylə bağlıdı?
- Futbolda belə şeylər baş verir. "Makkabi"yə qarşı təxminən 3 saat mübarizə apardıq. Çox keçmədən, "Şamaxı"yla qarşılaşdıq. Zədəlilərimiz var. Əlbəttə, biz bütün matçlara 3 xal qazanmaq üçün çıxırıq. "Zirə"ylə görüşün taleyini isə penalti həll etdi. Bundan sonra oyun istədiyimiz kimi getmədi. Pozitiv məqamlara köklənməyə üstünlük verirəm.

- Hadisələrin axarı ötən mövsümün əvvəlinə bənzəyir. Bu vəziyyətdən çıxış yolu tapıbsız?
- Yenə deyirəm, "Sabah" gəncdi. Belə halların baş verməsi normaldı. Adi prosesdi. Komanda ardıcıl iki dəfə avrokuboklara vəsiqə qazanıb. Bu, çox böyük uğurdu. Onu da nəzərə alın ki, bir həftədə iki oyunda meydana çıxmaq çox çətindi. Yorğunluq olur.

- Yəni, "Sabah" ötən mövsüm yaşadıqlarından dərs alıb?
- Ötən mövsüm, ötən mövsüm... Məncə, müqayisəni dayandıraq.

- "Sent Patriks" ilk matçda ləng oyun tərziylə diqqət çəkdi. Cavab oyununda daha dinamik qarşılaşma izləyə biləcəyik?
- Qətiyyətlə deyə bilərəm ki, ilk saniyələrdən hücum futbolu sərgiləyəcəyik.

- Penalti seriyasına hazırlaşmısız?
- Yox. Penalti zərbələrini kimin daha yaxşı yerinə yetirdiyini bilirəm. Hesab edirəm ki, matç penaltilər seriyasına getməyəcək.

KƏNAN BAHADIR