“Qarşıya 1-ci liqaya vəsiqə qazanmaq hədəfi qoyulub” - Elvin Nəsibov “Şəfa”da
Ötən mövsümün ortasında “Cəbrayıl”dan “Füzuli”yə keçərək mövsümün sonunda ordan da ayrılan Elvin Nəsibovun yeni klubu bəlli olub.
Yenidən 2-ci liqada mübarizə aparacaq Nəsibov bu dəfə “Şəfa”nı seçib. Dünən keçirilən təqdimat mərasimində futbolçu birillik müqavilə bağladı. Bəs “Kəpəz”in yetirməsi niyə “Şəfa”nı seçib?
28 yaşlı futbolçu transferiylə bağlı “Football-plus.az”a açıqlamasında bu sözləri deyib:
“Təkliflərim 2-ci liqa klublarından idi. Gördüm ki, “Şəfa”nın planları, strategiyası uzunmüddətlidi. Bu da diqqətimi cəlb etdi. Rəhbərlik bizə lazım olan şəraiti yaradıb. Məqsədimiz çempionluqdu. Hazırda 1-ci liqaya vəsiqə qazanmaq hədəfi qoyulub. Biz də çalışacağıq ki, əlimizdən gələni edək. Öz növbəmdə sevinirəm ki, belə bir komandanın şərəfini qoruyacam. Yəni bizə lazım olan hər cür imkan yaradılıb. Öhdəmizə düşən yaxşı oynayıb, uğurlu oynamaqdı. Bunun da öhdəsindən layiqincə gəlmək istəyindəyik”.
Xatırladaq ki, Nəsibov ötən mövsüm 20 qol vurmaqla 2-ci liqanın bombardirlərindən olub.
RÖYANƏ OĞUZ
