Fransada keçirilən 33-cü Yay Olimpiya Oyunları srağagün başa çatdı.

Etiraf etmək lazımdı ki, təşkilatçılıqla bağlı bütün qalmaqallara və çətinliklərə rəğmən, Paris Olimpiadası uzun müddət unudulmayacaq. Məlum səbəbdən turnirdən kənarda qalan Rusiyanın informasiya kanallarının Azərbaycana ötürdüyü mənfi ruhlu xəbərlər də var idi. Amma ümumilikdə Paris Olimpiadası bir çox dünya və olimpiya rekordlarının qeydə alındığı, ABŞ və Çin arasında son saniyəyə qədər davam edən birincilik yarışı ilə əlamətdar oldu.

Ən populyar idman növlərindən olan boksda qardaş ölkə Özbəkistanın uğurunu qeyd etməliyik. Kişilər arasında 7 çəki dərəcəsinin beşində məhz bu ölkənin təmsilçiləri fəxri kürsünün ən yüksək pilləsinə qalxdı. Qaliblərdən biri də Azərbaycan təmsilçisi Alfonso Domingesə (92 kq) göz açmağa imkan verməyən Lazizbek Mullajonov oldu. Yeri gəlmişkən, bu çəki dərəcəsi üzrə mükafatlandırma mərasimində maraqlı hadisə baş verdi. 3-cü yeri tutan Tacikistan təmsilçisi Davlat Boltayevin şərəfinə ölkəsini yox, Taylandın bayrağı qaldırıldı.

Bu Olimpiada ABŞ-nin kişlərdən və qadınlardan ibarət basketbol yığmalarının benefisinə çevrildi. ABŞ və Fransa yığmaları arasındakı finalı hər kəs səbirsizliklə gözləyirdi. Serbiya ilə yarımfinal oyununda ilk üç çeyrəkdə uduzan, yalnız sonuncu çeyrəkdə hadisələrin axarını öz xeyrinə dəyişən amerikalılar bu dəfə işi sona saxlamadı. Onlar ilk yarıdan sonra 8 xal öndə idilər ki, sona qədər bu üstünlüyü qoruya bildilər. 24 xal toplayan, 13 üçxallıq atışından 8-i dəqiq olan Stefen Karri qələbədə önəmli rol oynadı.

Tarixində 17-ci, ardıcıl 5-ci dəfə olimpiya çempionu olan ABŞ yığmasının heyətində başqa seçilən adlar da var idi. Lebron Ceyms kişilərin turnirində ən dəyərli oyunçu sayıldı. 39 yaşlı ulduz hər oyunda orta hesabla 14,2 xal, 8,5 ötürmə, 6,8 ribaund və 1,3 topələkeçirmə ilə yadda qaldı. Karyerasında 3-cü dəfə olimpiya çempionu olan Lebron Olimpiada-2028-də iştirak perspektivi haqda da danışdı: “Mən özümü Los-Anceles Olimpiadasında oynayan kimi təsəvvür etmirəm. Yeri gəlmişkən, heç Paris Olimpiadasında da təsəvvür etmirdim. Ancaq 4 ildən sonra – yox-yox, bunu təsəvvür edə bilmirəm”.
ABŞ yığmasının forvardı Kevin Dürant isə komanda idman növlərində ilk dördqat olimpiya çempionu oldu. O, buna qədər 2012, 2016, 2020-ci il Olimpiadalarında da qızıl medalı boynundan asmışdı.
Kişilərdən ibarət yığma şənbə günü qalib gəldisə, bazar günü qadınlardan ibarət yığma estafeti qəbul etdi. Amerikalı xanımlar Olimpiadalarda ardıcıl 62-ci qələbəsini qazandı. Onlar ardıcıl 8-ci, ümumilikdə 10-cu dəfə olimpiya çempionu oldular.

Məhz qadın basketbolçular arasında final görüşü Paris Olimpiadasının sonuncu yarışı idi. ABŞ bu qızıl medal sayəsində komanda hesabında Çini qabaqladı. Ştatlardan olan idmançılar 40 qızıl, 44 gümüş, 42 bürünc, çinlilər isə 40 qızıl, 27 gümüş, 24 bürünc medal qazandılar.

Serbiya yığmasının mərkəz oyunçusu Nikola Yokiç Almaniya ilə 3-cü yer uğrunda oyunun qəhrəmanlarından oldu. Serblərin 93:83 hesablı qələbəsiylə bitən oyunda 29 yaşlı ulduz 19 xal, 12 ribaund və 10 məhsuldar ötürmə ilə yadda qaldı. Yokiç Olimpiadanın basketbol turnirinin tarixinə bir oyunda tripl-dabl etməyi bacaran 4-cü oyunçu kimi düşdü. Ona qədər belə nəticəyə Lebron Ceyms (2012, 2024), sovet basketbolçusu Alekandr Belov (1976) və sloveniyalı Luka Donçiç (2020) nail olmuşdu. Yokiçin 2016-cı il Olimpiadasının gümüş medalçısı olduğunu da xatırladaq.