"Sabah" Konfrans Liqasının 3-cü təsnifat mərhələsinin cavab matçında evdə "Sent Patriks"ə uduzaraq mübarizəni dayandırdı - 0:1.

"Football-plus.az" xəbər verir ki, "bayquşlar"ın baş məşqçisi Krunoslav Renduliç matçdan sonra keçirilən mətbuat konfransında jurnalistlərin suallarını cavablandırıb.

- Əvvəlcə hər kəsi salamlayıram. Mənim üçün xoşdu ki, bu gün mətbuat konfransında xanımların sayı çoxdu. Bu gün rəqibə nisbətən daha yaxşı idik. Əfsuslar olsun ki, qırmızı vərəqədən sonra çətinlik çəkdik. Yenə də oyuna nəzarət etməyə çalışdıq. Hər iki matçda azlıqda qaldıq. Oyunçularım döyüşdü, mübarizə apardı. Təəssüf ki, bu gün məqsədə çata bilmədik.

- Hansı xüsusiyyətlərinizə görə rəqibdən daha yaxşı olduğunuzu düşünürsüz?
- Yenə deyirəm, rəqibdən daha yaxşı idik. Təəssüf ki, uduzduq. Mənə bir məqam deyin ki, bizdən daha üstün idilər.

- Rəqib qapıya bir zərbə endirdi, o da qol oldu. Dəqiqlik üstünlük deyil?
- Bundan başq nəsə deyin...

- Əsas dəqiqlikdi. Tarixdə nəticə qalır.
- Nəticə əlbəttə qalır. Amma futbolçularım döyüşdü.

- Yəni "Sabah"da hər şey yaxşıdı?
- Mən nə vaxt elə söz dedim? Uduzduq. Bu faktdı. Rəqib bizdən daha yaxşı çıxış etdi.

- Uzun müddətdi ki, meydana çıxmayan Abdulla Xaybullayevin start heyətində olmasının səbəbi nə idi?
- Problemlərimiz var. Ayaz Quliyev 3 ay meydana çıxa bilməyəcək. İvan Lepinitsa cəzalı idi. Abdulla Şakir Seyidovdan daha hazırlıqlı olduğu üçün ona güvəndim.

- Bəs həmin mövqedə dayaq yarımmüdafiəçisinin xidmətindən yararlanmaq olmazdı? Məsələn, Xəyalın?
- Məqsədimiz hücumlarda üç futbolçudan istifadə etmək idi. Qırmızı vərəqə planı pozdu. Bundan sonra nəsə etməyə çalışdıq.

- Məğlubiyyətə görə günahkar kimdi? Siz yoxsa futbolçular?
- Həmişə məşqçi günahkardı. Mən qorxmuram və məsuliyyəti öz üzərimə götürürəm. Futbolçularımı günahlandıra bilmərəm.

- Uduzan komandanın baş məşqçisi kimi çox arxayın görünürsüz. Futbolçular arasındakı əlaqə və fiziki hazırlıq çox zəif idi. Xəyal təngnəfəs qalmışdı. Bu məsələlər haqda nə düşünürsüz?
- Ötən il "Turan Tovuz"a uduzduqdan sonra da jurnalistlər rahat göründüyümü demişdi. Halbuki mən işimə çox ciddi yanaşıram. Hansısa məsuliyyətsizlikdən söhbət gedə bilməz. Xəyalın təngnəfəsliyi komandanın azlıqda qalmasıyla bağlı oldu. O, çox qaçdı.

- Rəhbərlik tərəfindən avrokuboklarla bağlı xüsusi tələb var idi?
- Yox. Ötən mövsüm də avrokuboklarda dörd matç keçirmişdik. Fərq odu ki, o vaxt "Partizan"a, indi "Sent Patriks"ə uduzduq.

KƏNAN BAHADIR