"Zirə" Misli premyer-liqasının 2-ci turunda "Sabah”ın meydanından qalib ayrıldı - 2:0.

"Football-plus.az" xəbər verir ki, "qartallar"ın baş məşqçisi Rəşad Sadıqov matçdan sonra keçirilən mətbuat konfransında jurnalistlərin suallarını cavablandırıb:

- Bu qələbə "Osiyek"lə oyunqabağı əlavə stimul olacaq? Nəzərə alsaq ki, 2 cəbhədə mübarizə aparırsınız. Bunun üçün heyətiniz yetərlidi?

- Qarşıda bizi olduqca vacib oyun gözləyir. Bu gündə edəcəyimiz transferlərin 2 cəbhədə mübarizə aparmağımızla əlaqəsi yoxdu. Etdiyimiz transferlər heyətlə bağldı. Bir transferimiz olmalıdı. Olmasa belə əlimizdə yaxşı heyətimiz var.

- Bu günlərdə Eldar Quliyev milliləşdirmə ilə bağlı mətbuata açıqlama verib. Deyib ki, "Azərbaycan pasportu nəyimə lazımdı?" Onunla söhbətiniz olub?

- Eldarla xeyli söhbətləşmişik. Orda böyüyüb boya başa çatıb. Can atır ki, Ukrayna millisinə düşsün. Bu yaxşı haldı. Rəqabət aparmaq istəyir. Bunun üçün çox çalışır, istəklidi. Bəlkə də onun yerinə kim olsa deyər elə Azərbaycan millisində oynayım. Şəxsən istəyərəm ki, onu Azərbaycan millisində görüm. Olmasa belə fikirlərini hörməylə qarşılayırıq.

- Rüstəm Əhmədzadənin performansında geriləmə müşahidə olunur. Onun problemi nədi?

- Ümumiyyətlə, son dönəmlərdə Rüstəmin oyunlarından razıyam. Yanvara qədər çox yaxşı mübarizə apardı. Onun zədə prosesi 3 ay çəkdi. Ağır zədəydi. Şükürlər olsun ki, sağaldı. “Osiyek”lə oyuna qızdırmayla meydana çıxmışdı. Suma cəzalı olsuğuna görə başqa variantımız yox idi. Həkimlər 30 dəqiqə dözə biləcəyini dedi. O da razılaşdı. “Səbail” və “DAK 1904”lə oyunda da yaxşı oynadı. Çox yaxşı mübarizə apardı. Bugünkü matçda çox futbolçuda top itkiləri var idi. Meydança qurumuşdu, hamı bunun əziyyətini çəkirdi. Rüstəm çox yaxşı mübarizə apardı.

- Xorvatiyada demişdiz ki, bizi cavab matçından əvvəl derbi gözləyir. Derbi ab-havası var idi bu gün?

- Ümumən hər iki komandada yorğunluq var idi. Xüsusən də mənim üçün derbi ab-havası var idi. 2:0 dan sonrayda rəqib böyük qüvvəyıə irəli çıxdı. İşimiz çətinləşdi. Çalışırdıq ki, əks-hücumlara çıxaq. Rüstəm də elə epizodlardan birini vura bilmədi.

- Hazırki duruma görə “Zirə”də hər şey yaxşıdı. Əldə olan komanda çempionata neçə faiz hazırdı?

- Biz məşqçilər heç vaxt kifayətlənmirik. Daima yaxşı olmaq istəyirik. Bu gün vacib 2 qələbə qazanmışıq. Şikayət edə bilmərəm. Amma məşqçi olaraq daha yaxşısı üçün çalışmalıyıq. Əlimizdə kifayət qədər yaxşı furbolçular var. Mənim üçün önəmli olan futbolçunun keyfiyyətli, istəkli olmasıdı. Bunlar da futbolçularımda var.

- Bu ritmi axıra qədər qoruya biləcəksiz?

- Zaman göstərəcək. Gələcəklə bağlı məsələdi. Əvvəldən nəsə deyə bilmərəm. Həqiqətən də məndən əvvəlki dönəmlərdə də yanvardan sonra nəsə olurdu və komanda qələbə qazana bilmirdi. Ötən mövsüm də belə oldu. Təxminən 10 oyun qələbə qazana bilmədik. İnşallah ki, çalışacayıq bu gedişatı saxlıyaq. Ancaq nəyin necə olacağını zaman göstərəcək.

- "Osiyek"in baş məşqçisi Frederiko Koppitelli bildirib ki, "Zirə"nin qol vuracağı inandırıcı görünmürdü. Bu haqda nə düşünürsən?

- Oxumuşam. Doğrusu, mənə də pis təsir etdi. Mənə də qəribə gəldi. Onların vurduğu qol bizim top itkimizdən baş vermişdi. Bir təhlükəli vəziyyət də standart vəziyyətdən yaratmışdılar. Hörmətlə qarşılayırıq. Bəlkə isti-isti belə danışıb.

- "Osiyek"in erməni futbolçusu Styopa Mkrtçyanın Bakıya mümkün gəlişi, hansı tərəfə müsbət və ya mənfi təsir göstərə bilər?

- Ümumiyətlə, istəməzdim ki, azarkeşlər tərəfindən hər hansı bir gərginlik olsun. Bu gün belə bir gərginliyə ehtiyac yoxdu. Biz qalib tərəfik. Ola bilsin ki, onların bizə qarşı gərginliyi olsun. Əvvəllər, futbolçu olduğum dönəmdə məndə də eləydi. Qarşı tərəfdə erməni futbolçu gördükdə qəzəblənirdim. Ancaq vətən müharibəsindən sonra elə bir aqressivliyim qalmayıb. Həqiqətən böyük oyuna çıxacaqyıq.

- Sirr deyilsə hansı mövqedə çatışmazlıq var.

- Bugünkü gün hansısa çatışmazlıqdan danışmaq ədalətsizlik olar. Sadəcə sayı genişləndirmək üçün hər hansısa mövqeyə bir furbolçu ala bilərik.

KAMAL SƏFƏR