"Turan Tovuz" Misli premyer-liqasının 1-ci turunda səfərdə "Neftçi" ilə heç-heçə edib - 0:0.

"Football-plus.az" xəbər verir ki, qərb bölgəsi təmsilçisinin baş məşqçisi Kurban Berdıyev matçdan sonra keçirilən mətbuat konfransında jurnalistlərin suallarını cavablandırıb:

- Oyunun çətin olacağını ehtimal edirdik. "Neftçi" çox yaxşı komandadı. Bu oyun bizim çatışmayan cəhətlərimizi göstərdi. Hansı istiqamətlərdə çalışmalı olduğumuzu bildik. Amma ümumi olaraq futbolçularımın performansından razı qaldım. Oyunboyu epizodlarda maksimum oynadılar.

- Çatışmazlıqları dediz. Hansı məqamların üzərində işləməlisiz?
Hücum fazasındakı məqamları qeyd edərdim. Uşaqlar necə oynamaq lazım olduğunu bilir. Yəqin ki, zamanla bunun öhdəsindən gələcəklər. Böyük çatışmazlıq deyil.

- Deyəsən, nəticədən narazısız. Amma "Neftçi" ilə səfərdə heç-heçə etmək pis deyil...
- Hər şeyi yaxşı anlayıram. Amma biz daha çoxuna ümid edirdik. Maksimum hazırlaşmışdıq. Oyunçular hücumda bacardığı və bildiyi kimi düzgün oynasa, hər şey başqa cür olardı.

- Son 10 dəqiqədə yorğunluq aşkar hiss olunurdu. Bunu nə ilə izah edərdiniz?
- Təbii haldı. "Neftçi"nin də oyunçuları yoruldu, bizimkilər də.

- Qarşılaşmadan əvvəl "Neftçi"ni təhlil edərkən hansı detalları nəzərə almışdız?
- Hər komandanın çatışmazlıqları var. Bizim də, həmçinin. Bəzi anlar yaxşı alınırdı, əsasən də Ayxanın epizodlarında. "Neftçi" haqda bilirik, amma buna şərh vermirik. Bağışlayın, sadəcə belədi.

- Stadiondakı atmosfer necə idi? Ot örtüyü rolunu oynadı?
- Atmosfer yaxşı idi. Azarkeşlərimizə təşəkkür edirik ki, bizə dəstək olmaq üçün gəlmişdilər. Qazon hər iki komanda üçün eyni idi.

- Böyük titullar qazandığınızı bilirik. Kurban Berdıyevin "Turan Tovuz"dakı hədəfi nədən ibarət olacaq?
- Heyətimizdən asılı olmayaraq, hədəflərimiz maksimumdu.